parī ke aane ke imkān bante jaate haiñ
ye dasht saare gulistān bante jaate haiñ

ajab havas hai mohalle meñ taḳht jītne kī
ye log haiñ ki sulaimān bante jaate haiñ

maiñ in ko dekh ke chāhūñ ke vo gale lag jaa.eñ
vo mujh ko dekh ke anjān bante jaate haiñ

vo jitne soch ke mushkil savāl kartā hai
javāb utne hī āsān bante jaate haiñ

unheñ maiñ sher kī sūrat kabhī ugal dūñgā
jo dil meñ dard ke tūfān bante jaate haiñ

ajiib kūza-garī se dimāġh juḌ gayā hai
gulāb soch luuñ gul-dān bante jaate haiñ

kisī faqīr ke hujre meñ baiThne ke ba.ad
jo aadmī haiñ vo insān bante jaate haiñ

pari ke aane ke imkan bante jate hain
ye dasht sare gulistan bante jate hain

ajab hawas hai mohalle mein taKHt jitne ki
ye log hain ki sulaiman bante jate hain

main in ko dekh ke chahun ke wo gale lag jaen
wo mujh ko dekh ke anjaan bante jate hain

wo jitne soch ke mushkil sawal karta hai
jawab utne hi aasan bante jate hain

unhen main sher ki surat kabhi ugal dunga
jo dil mein dard ke tufan bante jate hain

ajib kuza-gari se dimagh juD gaya hai
gulab soch lun gul-dan bante jate hain

kisi faqir ke hujre mein baiThne ke baad
jo aadmi hain wo insan bante jate hain