Subscribe to our newsletter and get our newest updates

Obaidullah Aleem

  • Ghazal


ye aur baat ki is ahd ki nazar mein hun


ye aur baat ki is ahd kī nazar meñ huuñ
abhī maiñ kyā ki abhī manzil-e-safar meñ huuñ

abhī nazar nahīñ aisī ki duur tak dekhūñ
abhī ḳhabar nahīñ mujh ko ki kis asar meñ huuñ

pighal rahe haiñ jahāñ log sho.ala-e-jāñ se
sharīk maiñ bhī isī mahfil-e-hunar meñ huuñ

jo chāhe sajda guzāre jo chāhe Thukrā de
paḌā huā maiñ zamāne kī rahguzar meñ huuñ

jo saaya ho to Darūñ aur dhuup ho to jalūñ
ki ek naḳhl-e-numū ḳhāk-e-nauha-gar meñ huuñ

kiran kiran kabhī ḳhurshīd ban ke niklūñgā
abhī charāġh kī sūrat meñ apne ghar meñ huuñ

bichhaḌ ga.ī hai vo ḳhushbū ujaḌ gayā hai vo rañg
bas ab to ḳhvāb sā kuchh apnī chashm-e-tar meñ huuñ

ye aur baat ki is ahd ki nazar mein hun
abhi main kya ki abhi manzil-e-safar mein hun

abhi nazar nahin aisi ki dur tak dekhun
abhi KHabar nahin mujh ko ki kis asar mein hun

pighal rahe hain jahan log shoala-e-jaan se
sharik main bhi isi mahfil-e-hunar mein hun

jo chahe sajda guzare jo chahe Thukra de
paDa hua main zamane ki rahguzar mein hun

jo saya ho to Darun aur dhup ho to jalun
ki ek naKHl-e-numu KHak-e-nauha-gar mein hun

kiran kiran kabhi KHurshid ban ke niklunga
abhi charagh ki surat mein apne ghar mein hun

bichhaD gai hai wo KHushbu ujaD gaya hai wo rang
bas ab to KHwab sa kuchh apni chashm-e-tar mein hun


Source: Funoon(Jadeed Ghazal Number: Volume-002)

Leave a comment

+