vīrān sarā.e kā diyā hai
jo kaun-o-makāñ meñ jal rahā hai

ye kaisī bichhaḌne kī sazā hai
ā.īne meñ chehra rakh gayā hai

ḳhurshīd misāl shaḳhs kal shaam
miTTī ke supurd kar diyā hai

tum mar ga.e hausla tumhārā
zinda huuñ maiñ ye merā hausla hai

andar bhī is zamīñ ke raushnī ho
miTTī meñ charāġh rakh diyā hai

maiñ kaun sā ḳhvāb dekhtā huuñ
ye kaun se mulk kī fazā hai

vo kaun sā haath hai ki jis ne
mujh aag ko ḳhaak se likhā hai

rakkhā thā ḳhalā meñ paañv maiñ ne
raste meñ sitāra aa gayā hai

shāyad ki ḳhudā meñ aur mujh meñ
ik jast kā aur fāsla hai

gardish meñ haiñ kitnī kā.enāteñ
bachcha mirā paañv chal rahā hai

viran sarae ka diya hai
jo kaun-o-makan mein jal raha hai

ye kaisi bichhaDne ki saza hai
aaine mein chehra rakh gaya hai

KHurshid misal shaKHs kal sham
miTTi ke supurd kar diya hai

tum mar gae hausla tumhaara
zinda hun main ye mera hausla hai

andar bhi is zamin ke raushni ho
miTTi mein charagh rakh diya hai

main kaun sa KHwab dekhta hun
ye kaun se mulk ki faza hai

wo kaun sa hath hai ki jis ne
mujh aag ko KHak se likha hai

rakkha tha KHala mein panw main ne
raste mein sitara aa gaya hai

shayad ki KHuda mein aur mujh mein
ek jast ka aur fasla hai

gardish mein hain kitni kaenaten
bachcha mera panw chal raha hai

Videos
This video is playing from YouTube Videos
This video is playing from YouTube Abida Parveen