tere pyaar meñ rusvā ho kar jaa.eñ kahāñ dīvāne log
jaane kyā kyā pūchh rahe haiñ ye jāne-pahchāne log

har lamha ehsās kī sahbā ruuh meñ Dhaltī jaatī hai
ziist kā nashsha kuchh kam ho to ho aa.eñ mai-ḳhāne log

jaise tumheñ ham ne chāhā hai kaun bhalā yuuñ chāhegā
maanā aur bahut ā.eñge tum se pyaar jatāne log

yuuñ galiyoñ bāzāroñ meñ āvāra phirte rahte haiñ
jaise is duniyā meñ sabhī aa.e hoñ umar gañvāne log

aage pīchhe daa.eñ baa.eñ saa.e se lahrāte haiñ
duniyā bhī to dasht-e-balā hai ham hī nahīñ dīvāne log

kaise dukhoñ ke mausam aa.e kaisī aag lagī yaaro
ab sahrāoñ se laate haiñ phūloñ ke nazrāne log

kal mātam be-qīmat hogā aaj un kī tauqīr karo
dekho ḳhūn-e-jigar se kyā kyā likhte haiñ afsāne log

tere pyar mein ruswa ho kar jaen kahan diwane log
jaane kya kya puchh rahe hain ye jaane-pahchane log

har lamha ehsas ki sahba ruh mein Dhalti jati hai
zist ka nashsha kuchh kam ho to ho aaen mai-KHane log

jaise tumhein hum ne chaha hai kaun bhala yun chahega
mana aur bahut aaenge tum se pyar jatane log

yun galiyon bazaron mein aawara phirte rahte hain
jaise is duniya mein sabhi aae hon umar ganwane log

aage pichhe daen baen sae se lahraate hain
duniya bhi to dasht-e-bala hai hum hi nahin diwane log

kaise dukhon ke mausam aae kaisi aag lagi yaro
ab sahraon se late hain phulon ke nazrane log

kal matam be-qimat hoga aaj un ki tauqir karo
dekho KHun-e-jigar se kya kya likhte hain afsane log

Videos
This video is playing from YouTube Videos
This video is playing from YouTube Obaidullah Aleem Noor Jahan

Source: Book : Chand Chehra Sitara Aankhen (Pg. 115) Book : Chand Chehra Sitara Aankhen (Pg. 115)