zamīn bār-hā badlī zamāñ nahīñ badlā
isī liye to ye merā jahāñ nahīñ badlā

na aarzū koī badlī na merī mahrūmī
badal gayā hai ravayya samāñ nahīñ badlā

udāsī aaj bhī vaisī hai jaise pahle thī
makīñ badalte rahe haiñ makāñ nahīñ badlā

kabhī charāġh kabhī dil jalā ke dekh liyā
zarā sā rañg to badlā dhuāñ nahīñ badlā

parinde ab bhī chahakte haiñ gul mahakte haiñ
sunā hai kuchh bhī abhī tak vahāñ nahīñ badlā

diloñ kā dard kisī taur kam nahīñ hogā
agar tasavvur-e-sūd-o-ziyāñ nahīñ badlā

zamin bar-ha badli zaman nahin badla
isi liye to ye mera jahan nahin badla

na aarzu koi badli na meri mahrumi
badal gaya hai rawayya saman nahin badla

udasi aaj bhi waisi hai jaise pahle thi
makin badalte rahe hain makan nahin badla

kabhi charagh kabhi dil jala ke dekh liya
zara sa rang to badla dhuan nahin badla

parinde ab bhi chahakte hain gul mahakte hain
suna hai kuchh bhi abhi tak wahan nahin badla

dilon ka dard kisi taur kam nahin hoga
agar tasawwur-e-sud-o-ziyan nahin badla

Source: Book : Rang hava main phel raha hai (Pg. 52)