apnī bhīgī huī palkoñ pe sajā lo mujh ko
rishta-e-dard samajh kar hī nibhā lo mujh ko

chuum lete ho jise dekh ke tum ā.īna
apne chehre kā vahī aks banā lo mujh ko

maiñ huuñ mahbūb añdheroñ kā mujhe hairat hai
kaise pahchān liyā tum ne ujālo mujh ko

chhāñv bhī dūñgā davāoñ ke bhī kaam ā.ūñgā
niim kā paudā huuñ āñgan meñ lagā lo mujh ko

dostoñ shīshe kā sāmān samajh kar barsoñ
tum ne bartā hai bahut ab to sambhālo mujh ko

ga.e sūraj kī tarah lauT ke aa jā.ūñgā
tum se maiñ ruuTh gayā huuñ to manā lo mujh ko

ek ā.īna huuñ ai 'naqsh' maiñ patthar to nahīñ
TuuT jā.ūñgā na is tarah uchhālo mujh ko

apni bhigi hui palkon pe saja lo mujh ko
rishta-e-dard samajh kar hi nibha lo mujh ko

chum lete ho jise dekh ke tum aaina
apne chehre ka wahi aks bana lo mujh ko

main hun mahbub andheron ka mujhe hairat hai
kaise pahchan liya tum ne ujalo mujh ko

chhanw bhi dunga dawaon ke bhi kaam aaunga
nim ka pauda hun aangan mein laga lo mujh ko

doston shishe ka saman samajh kar barson
tum ne barta hai bahut ab to sambhaalo mujh ko

gae suraj ki tarah lauT ke aa jaunga
tum se main ruTh gaya hun to mana lo mujh ko

ek aaina hun ai 'naqsh' main patthar to nahin
TuT jaunga na is tarah uchhaalo mujh ko