Subscribe to our newsletter and get our newest updates

Naqqash Kazmi

  • Ghazal


sukut-e-shab mein andheron ko muskurane de


sukūt-e-shab meñ añdheroñ ko muskurāne de
bujhe charāġh to phir jism-o-jāñ jalāne de

dukhoñ ke ḳhvāb-numā nīm-vā darīchoñ meñ
vafūr-e-karb se tāroñ ko jhilmilāne de

jalānā chāhe agar chāhatoñ kā sūraj bhī
badan ke shahar ko is dhuup meñ jalāne de

tū apne sañg-numā ruuh ke safīne ko
ġham-e-vafā ke samundar meñ Duub jaane de

mire vajūd meñ kāñToñ kā ek jañgal hai
vo apnī zaat ke phūloñ meñ kyuuñ samāne de

kise ḳhabar hai ki ham donoñ apne qātil haiñ
jo be-ḳhabar haiñ unheñ chīḳh kar batāne de

huuñ muntazir ki koī aaj aane vaalā hai
ba-qadr-e-zauq dar-o-bām ko sajāne de

guzarte lamhoñ ke hamrāh TūTtā hai badan
visāl-e-yār kī lazzat kā baar uThāne de

maiñ pattharoñ kī tarah chup nahīñ ai tesha-ba-dast
vo aur hogā tujhe zarb jo lagāne de

jab apne paañv meñ zanjīr paḌ ga.ī hai to phir
chalā to jaatā nahīñ gard hī uḌāne de

bhaTak rahā huuñ bagūloñ ke rañg meñ 'naqqāsh'
badan to ḳhaak huā ruuh bhī jalāne de

sukut-e-shab mein andheron ko muskurane de
bujhe charagh to phir jism-o-jaan jalane de

dukhon ke KHwab-numa nim-wa darichon mein
wafur-e-karb se taron ko jhilmilane de

jalana chahe agar chahaton ka suraj bhi
badan ke shahar ko is dhup mein jalane de

tu apne sang-numa ruh ke safine ko
gham-e-wafa ke samundar mein Dub jaane de

mere wajud mein kanTon ka ek jangal hai
wo apni zat ke phulon mein kyun samane de

kise KHabar hai ki hum donon apne qatil hain
jo be-KHabar hain unhen chiKH kar batane de

hun muntazir ki koi aaj aane wala hai
ba-qadr-e-zauq dar-o-baam ko sajaane de

guzarte lamhon ke hamrah TuTta hai badan
visal-e-yar ki lazzat ka bar uThane de

main pattharon ki tarah chup nahin ai tesha-ba-dast
wo aur hoga tujhe zarb jo lagane de

jab apne panw mein zanjir paD gai hai to phir
chala to jata nahin gard hi uDane de

bhaTak raha hun bagulon ke rang mein 'naqqash'
badan to KHak hua ruh bhi jalane de


Leave a comment

+