Subscribe to our newsletter and get our newest updates

Naqqash Abidi

  • Ghazal


tumhaara nam zaban se nikal gaya aaKHir


tumhārā naam zabāñ se nikal gayā āḳhir
zamāna mere gumāñ se nikal gayā āḳhir

sambhāl kar jise rakkhā huā thā muddat se
vo tiir terī kamāñ se nikal gayā āḳhir

tamām apne savāl-o-javāb bhuul ga.e
hisāb-e-sūd-o-ziyāñ se nikal gayā āḳhir

har ek shaḳhs meñ tujh ko talāsh kartā huā
hujūm-e-nukta-varāñ se nikal gayā āḳhir

jo lāzmī thā tire sāmne adā honā
vo ek lafz bayāñ se nikal gayā āḳhir

tumhāre sāmne kab tak ḳhirad vafā kartī
makīn-e-hosh makāñ se nikal gayā āḳhir

mirī talāsh meñ had hī ubuur kar Daalī
mire liye vo jahāñ se nikal gayā āḳhir

tumhaara nam zaban se nikal gaya aaKHir
zamana mere guman se nikal gaya aaKHir

sambhaal kar jise rakkha hua tha muddat se
wo tir teri kaman se nikal gaya aaKHir

tamam apne sawal-o-jawab bhul gae
hisab-e-sud-o-ziyan se nikal gaya aaKHir

har ek shaKHs mein tujh ko talash karta hua
hujum-e-nukta-waran se nikal gaya aaKHir

jo lazmi tha tere samne ada hona
wo ek lafz bayan se nikal gaya aaKHir

tumhaare samne kab tak KHirad wafa karti
makin-e-hosh makan se nikal gaya aaKHir

meri talash mein had hi ubur kar Dali
mere liye wo jahan se nikal gaya aaKHir


Leave a comment

+