dil mirā ḳhūgar-e-ālām huā jaatā hai
ab sitam bhī tirā in.aam huā jaatā hai

zabt-e-ġham maut kā paiġhām huā jaatā hai
dil kī bātoñ meñ mirā kaam huā jaatā hai

nisbat-e-ḳhās to hai zulm pe yuuñ shaad the ham
ye bhī andāz tirā aam huā jaatā hai

terī maḳhmūr nigāhoñ ke tasadduq meñ koī
vāqif-e-rāz-e-mai-o-jām huā jaatā hai

tark-e-ulfat se junūñ mujh ko huā yuuñ hī sahī
husn kyuuñ larza-bar-andām huā jaatā hai

dil jo thā sāġhar-e-sahbā-e-sukūñ ai 'naḳhshab'
markaz-e-gardish-e-ayyām huā jaatā hai

dil mera KHugar-e-alam hua jata hai
ab sitam bhi tera inam hua jata hai

zabt-e-gham maut ka paigham hua jata hai
dil ki baaton mein mera kaam hua jata hai

nisbat-e-KHas to hai zulm pe yun shad the hum
ye bhi andaz tera aam hua jata hai

teri maKHmur nigahon ke tasadduq mein koi
waqif-e-raaz-e-mai-o-jam hua jata hai

tark-e-ulfat se junun mujh ko hua yun hi sahi
husn kyun larza-bar-andam hua jata hai

dil jo tha saghar-e-sahba-e-sukun ai 'naKHshab'
markaz-e-gardish-e-ayyam hua jata hai

Source: Mashal-e-raah