va.ade kā e'tibār to hai vāqa.ī mujhe
ye aur baat hai ki hañsī aa ga.ī mujhe

laa.ī hai kis maqām pe vāraftagī mujhe
mahsūs ho rahī hai ab apnī kamī mujhe

samjhe haiñ vo junūñ to junūñ hī sahī mujhe
dānista ab badalnī paḌī zindagī mujhe

jalvoñ kī raushnī meñ jo khoyā thā pā gayā
tum se nazar milī to mohabbat milī mujhe

māhaul sāzgār-e-mizāj-e-vafā na thā
duniyā se bach ke un kī nazar dekhtī mujhe

yuuñ rabt-o-zabt-e-shauq baḌhāyā ba-tarz-e-nau
jaise ki pahle un se mohabbat na thī mujhe

'naḳhshab' miTāyā jis ne vafāoñ kī aaḌ meñ
us bevafā se phir bhī mohabbat rahī mujhe

wade ka e'tibar to hai waqai mujhe
ye aur baat hai ki hansi aa gai mujhe

lai hai kis maqam pe waraftagi mujhe
mahsus ho rahi hai ab apni kami mujhe

samjhe hain wo junun to junun hi sahi mujhe
danista ab badalni paDi zindagi mujhe

jalwon ki raushni mein jo khoya tha pa gaya
tum se nazar mili to mohabbat mili mujhe

mahaul sazgar-e-mizaj-e-wafa na tha
duniya se bach ke un ki nazar dekhti mujhe

yun rabt-o-zabt-e-shauq baDhaya ba-tarz-e-nau
jaise ki pahle un se mohabbat na thi mujhe

'naKHshab' miTaya jis ne wafaon ki aaD mein
us bewafa se phir bhi mohabbat rahi mujhe

Source: Rooh-e-Ghazal,Pachas Sala Intekhab