Subscribe to our newsletter and get our newest updates

Zaheer Dehlvi

  • Ghazal


ye sab kahne ki baaten hain hum un ko chhoD baiThe hain


ye sab kahne kī bāteñ haiñ ham un ko chhoḌ baiThe haiñ
jab āñkheñ chaar hotī haiñ muravvat aa hī jaatī hai

vo apnī shoḳhiyoñ se koī ab tak baaz aate haiñ
hamesha kuchh na kuchh dil meñ sharārat aa hī jaatī hai

na uljho tān.a-e-dushman pe aisā ho hī jaatā hai
jahāñ iḳhlās hotā hai shikāyat aa hī jaatī hai

liyā jab naam ulfat kā badal jaatī hai sīrat bhī
nigāh-e-sharm-āgīñ meñ sharārat aa hī jaatī hai

kabhī chitvan se an-ban hai kabhī saudā hai gesū kā
nasīboñ kī ye shāmat hai ki shāmat aa hī jaatī hai

hamesha ahd hote haiñ nahīñ milne ke ab un se
vo jab aa kar lipaTte haiñ mohabbat aa hī jaatī hai

kahīñ ārām se do din falak rahne nahīñ detā
hamesha ik na ik sar par musībat aa hī jaatī hai

hisāb-e-dostāñ dar-e-dil taqāzā hai mohabbat kā
masal mash.hūr hai ulfat se ulfat aa hī jaatī hai

ye sab kahne ki baaten hain hum un ko chhoD baiThe hain
jab aankhen chaar hoti hain murawwat aa hi jati hai

wo apni shoKHiyon se koi ab tak baz aate hain
hamesha kuchh na kuchh dil mein shararat aa hi jati hai

na uljho tana-e-dushman pe aisa ho hi jata hai
jahan iKHlas hota hai shikayat aa hi jati hai

liya jab nam ulfat ka badal jati hai sirat bhi
nigah-e-sharm-agin mein shararat aa hi jati hai

kabhi chitwan se an-ban hai kabhi sauda hai gesu ka
nasibon ki ye shamat hai ki shamat aa hi jati hai

hamesha ahd hote hain nahin milne ke ab un se
wo jab aa kar lipaTte hain mohabbat aa hi jati hai

kahin aaram se do din falak rahne nahin deta
hamesha ek na ek sar par musibat aa hi jati hai

hisab-e-dostan dar-e-dil taqaza hai mohabbat ka
masal mashhur hai ulfat se ulfat aa hi jati hai


Leave a comment

+