Subscribe to our newsletter and get our newest updates

Imam Bakhsh Nasikh

  • Ghazal


tu ne mahjur kar diya hum ko


tū ne mahjūr kar diyā ham ko
saḳht ranjūr kar diyā ham ko

apnī barq-e-nigāh se tum ne
shajar-e-tūr kar diyā ham ko

dil banā āshiqī meñ ḳhud-muḳhtār
aur majbūr kar diyā ham ko

aisī tārīf kī ki ai vaa.iz
āshiq-e-hūr kar diyā ham ko

ġham nahīñ mohtasib jo toḌ ke ḳhum
nashshe ne chuur kar diyā ham ko

jis qadar ham se tum hue nazdīk
us qadar duur kar diyā ham ko

kabhī bār-e-ġham-e-firāq utaar
tū ne mazdūr kar diyā ham ko

ho gayā mai se nasha-e-irfān
naar ne nuur kar diyā ham ko

the to maqhūr hone ke laa.eq
baare maġhfūr kar diyā ham ko

tu ne mahjur kar diya hum ko
saKHt ranjur kar diya hum ko

apni barq-e-nigah se tum ne
shajar-e-tur kar diya hum ko

dil bana aashiqi mein KHud-muKHtar
aur majbur kar diya hum ko

aisi tarif ki ki ai waiz
aashiq-e-hur kar diya hum ko

gham nahin mohtasib jo toD ke KHum
nashshe ne chur kar diya hum ko

jis qadar hum se tum hue nazdik
us qadar dur kar diya hum ko

kabhi bar-e-gham-e-firaq utar
tu ne mazdur kar diya hum ko

ho gaya mai se nasha-e-irfan
nar ne nur kar diya hum ko

the to maqhur hone ke laeq
bare maghfur kar diya hum ko


Leave a comment

+