darāz-dast ko dast-e-atā kahīñ na milā
baḳhīl-e-shahr thā hājat-ravā kahīñ na milā

fasīl-e-shab pe sahar kā diyā jalātā kaun
ki koī shaḳhs mujhe jāgtā kahīñ na milā

lahū kī aag thī raushan har ik hathelī par
kisī bhī haath pe rañg-e-hinā kahīñ na milā

girā ḳhud apnī nazar se to pūchhtā phir kaun
ḳhudī gañvā.ī to mujh ko ḳhudā kahīñ na milā

sabhī the apne ḳhudāoñ se bad-gumāñ shāyad
kisī zabān pe harf-e-duā kahīñ na milā

daraaz-dast ko dast-e-ata kahin na mila
baKHil-e-shahr tha hajat-rawa kahin na mila

fasil-e-shab pe sahar ka diya jalata kaun
ki koi shaKHs mujhe jagta kahin na mila

lahu ki aag thi raushan har ek hatheli par
kisi bhi hath pe rang-e-hina kahin na mila

gira KHud apni nazar se to puchhta phir kaun
KHudi ganwai to mujh ko KHuda kahin na mila

sabhi the apne KHudaon se bad-guman shayad
kisi zaban pe harf-e-dua kahin na mila