aisī vahshat nahīñ dil ko ki sambhal jā.ūñgā
sūrat-e-pairahan-e-tañg nikal jā.ūñgā

vo nahīñ huuñ ki rukhā.ī se jo Tal jā.ūñgā
aaj jaatā thā to zid se tirī kal jā.ūñgā

shām-e-hijrāñ kisī sūrat se nahīñ hotī sub.h
muñh chhupā kar maiñ añdhere meñ nikal jā.ūñgā

khīñch kar teġh kamar se kise dikhlāte ho
nāf-e-ma.ashūq nahīñ huuñ jo maiñ Tal jā.ūñgā

shab-e-hijr apnī siyāhī kise dikhlātī hai
kuchh maiñ laḌkā to nahīñ huuñ ki dahal jā.ūñgā

kūcha-e-yār kā saudā hai mire sar ke saath
paañv thak thak ke hoñ har-chand ki shal jā.ūñgā

zabt-e-betābī-e-dil kī nahīñ tāqat baaqī
koh-e-sabr ab ye sadā detā hai Tal jā.ūñgā

tāl-e-bad ke asar se ye yaqīñ hai mujh ko
terī hasrat hī meñ ai husn-e-amal jā.ūñgā

chaar din ziist ke guzreñge ta.assuf meñ mujhe
hāl-e-dil par kaf-e-afsos maiñ mal jā.ūñgā

sho.ala-rūyoñ ko na dikhlāo mujhe ai āñkho
mom se narm mirā dil hai pighal jā.ūñgā

hāl-e-pīrī kise ma.alūm javānī meñ thā
kyā samajhtā thā maiñ do din meñ badal jā.ūñgā

vahī dīvāngī merī hai bahār aane do
dekh kar laḌkoñ kī sūrat ko bahal jā.ūñgā

sher Dhalte haiñ mirī fikr se aaj ai 'ātish'
mar ke kal gor ke sāñche meñ maiñ Dhal jā.ūñgā

aisi wahshat nahin dil ko ki sambhal jaunga
surat-e-pairahan-e-tang nikal jaunga

wo nahin hun ki rukhai se jo Tal jaunga
aaj jata tha to zid se teri kal jaunga

sham-e-hijran kisi surat se nahin hoti subh
munh chhupa kar main andhere mein nikal jaunga

khinch kar tegh kamar se kise dikhlate ho
naf-e-mashuq nahin hun jo main Tal jaunga

shab-e-hijr apni siyahi kise dikhlati hai
kuchh main laDka to nahin hun ki dahal jaunga

kucha-e-yar ka sauda hai mere sar ke sath
panw thak thak ke hon har-chand ki shal jaunga

zabt-e-betabi-e-dil ki nahin taqat baqi
koh-e-sabr ab ye sada deta hai Tal jaunga

tal-e-bad ke asar se ye yaqin hai mujh ko
teri hasrat hi mein ai husn-e-amal jaunga

chaar din zist ke guzrenge tassuf mein mujhe
haal-e-dil par kaf-e-afsos main mal jaunga

shoala-ruyon ko na dikhlao mujhe ai aankho
mom se narm mera dil hai pighal jaunga

haal-e-piri kise malum jawani mein tha
kya samajhta tha main do din mein badal jaunga

wahi diwangi meri hai bahaar aane do
dekh kar laDkon ki surat ko bahal jaunga

sher Dhalte hain meri fikr se aaj ai 'atish'
mar ke kal gor ke sanche mein main Dhal jaunga