dil gayā tum ne liyā ham kyā kareñ
jaane vaalī chiiz kā ġham kyā kareñ

ham ne mar kar hijr meñ paa.ī shifā
aise achchhoñ kā vo mātam kyā kareñ

apne hī ġham se nahīñ miltī najāt
is binā par fikr-e-ālam kyā kareñ

ek sāġhar par hai apnī zindagī
rafta rafta is se bhī kam kyā kareñ

kar chuke sab apnī apnī hikmateñ
dam nikaltā ho to hamdam kyā kareñ

dil ne sīkhā sheva-e-begānagī
aise nā-mahram ko mahram kyā kareñ

ma.arka hai aaj husn o ishq kā
dekhiye vo kyā kareñ ham kyā kareñ

ā.īna hai aur vo haiñ dekhiye
faisla donoñ ye bāham kyā kareñ

aadmī honā bahut dushvār hai
phir farishte hirs-e-ādam kyā kareñ

tund-ḳhū hai kab sune vo dil kī baat
aur bhī barham ko barham kyā kareñ

Hyderabad aur lañgar yaad hai
ab ke dillī meñ moharram kyā kareñ

kahte haiñ ahl-e-sifārish mujh se 'dāġh'
terī qismat hai burī ham kyā kareñ

dil gaya tum ne liya hum kya karen
jaane wali chiz ka gham kya karen

hum ne mar kar hijr mein pai shifa
aise achchhon ka wo matam kya karen

apne hi gham se nahin milti najat
is bina par fikr-e-alam kya karen

ek saghar par hai apni zindagi
rafta rafta is se bhi kam kya karen

kar chuke sab apni apni hikmaten
dam nikalta ho to hamdam kya karen

dil ne sikha shewa-e-beganagi
aise na-mahram ko mahram kya karen

marka hai aaj husn o ishq ka
dekhiye wo kya karen hum kya karen

aaina hai aur wo hain dekhiye
faisla donon ye baham kya karen

aadmi hona bahut dushwar hai
phir farishte hirs-e-adam kya karen

tund-KHu hai kab sune wo dil ki baat
aur bhi barham ko barham kya karen

Hyderabad aur langar yaad hai
ab ke dilli mein moharram kya karen

kahte hain ahl-e-sifarish mujh se 'dagh'
teri qismat hai buri hum kya karen

Videos
This video is playing from YouTube Videos
This video is playing from YouTube Noor Jahan