tum achchhe masīhā ho davā kyuuñ nahīñ dete
be-nūr jo hai sham.a bujhā kyuuñ nahīñ dete

be-nām huuñ be-nañg huuñ zāhir to hai tum par
gar rabt nahīñ dil se bhulā kyuuñ nahīñ dete

ḳhushbū kī tarah phuul kī uTThūñgā chaman se
to phuul ko zulfoñ se girā kyuuñ nahīñ dete

pahuñchūñgā kashākash meñ jahāñ tum ne bulāyā
tum hashr ke maidāñ se sadā kyuuñ nahīñ dete

mahfil meñ agar raunaq-e-mahfil hai koī aur
ye baat bhī mahfil ko batā kyuuñ nahīñ dete

ik buuñd sī larzāñ hai sar-e-chashm-e-tamannā
nāyāb nahīñ aab girā kyuuñ nahīñ dete

nā-karda gunāhoñ kī sazā maut milī hai
phir karda-gunāhoñ kī sazā kyuuñ nahīñ dete

zaḳhmoñ ko mire dil pe agar dekh liyā hai
dāman se vafāoñ kī havā kyuuñ nahīñ dete

dekhā thā kabhī ham ne mohabbat kā janāza
baaqī hai agar kuchh to dikhā kyuuñ nahīñ dete

har lamha hamārā hī fasāna hai zabāñ par
ham kuchh bhī nahīñ haiñ to bhalā kyuuñ nahīñ dete

kar leñge har ik manzil-e-dushvār ko sar ham
ik jaam mohabbat kā pilā kyuuñ nahīñ dete

tum achchhe masiha ho dawa kyun nahin dete
be-nur jo hai shama bujha kyun nahin dete

be-nam hun be-nang hun zahir to hai tum par
gar rabt nahin dil se bhula kyun nahin dete

KHushbu ki tarah phul ki uTThunga chaman se
to phul ko zulfon se gira kyun nahin dete

pahunchunga kashakash mein jahan tum ne bulaya
tum hashr ke maidan se sada kyun nahin dete

mahfil mein agar raunaq-e-mahfil hai koi aur
ye baat bhi mahfil ko bata kyun nahin dete

ek bund si larzan hai sar-e-chashm-e-tamanna
nayab nahin aab gira kyun nahin dete

na-karda gunahon ki saza maut mili hai
phir karda-gunahon ki saza kyun nahin dete

zaKHmon ko mere dil pe agar dekh liya hai
daman se wafaon ki hawa kyun nahin dete

dekha tha kabhi hum ne mohabbat ka janaza
baqi hai agar kuchh to dikha kyun nahin dete

har lamha hamara hi fasana hai zaban par
hum kuchh bhi nahin hain to bhala kyun nahin dete

kar lenge har ek manzil-e-dushwar ko sar hum
ek jam mohabbat ka pila kyun nahin dete