Subscribe to our newsletter and get our newest updates

Talib Husain Talib

  • Ghazal


gham-e-jahan mein gham-e-yar zam na kar paya


ġham-e-jahāñ meñ ġham-e-yār zam na kar paayā
hazār kaam kiyā ''maiñ'' ko ''ham'' na kar paayā

mujhe sarāb meñ manzil dikhā.ī detī thī
so girte paḌte bhī raftār kam na kar paayā

vo din bhī dekhe haiñ maiñ ne ki ek luqma-e-tar
dahan tak aayā supurd-e-shikam na kar paayā

mujhe ye dukh ki bichhaḌne kā vaqt thā hī nahīñ
use malāl ki iz.hār-e-ġham na kar paayā

na paas koh-e-nidā thā na haath meñ bandūq
so lauh-e-vaqt pe dukhḌā raqam na kar paayā

kisī kā milnā, bichhaḌnā aur ek do bāteñ
tamām silsila zeb-e-qalam na kar paayā

ḳhudā kā aks aur us par jamāl-e-yār kā aks
faqīr mar gayā paanī pe dam na kar paayā

gham-e-jahan mein gham-e-yar zam na kar paya
hazar kaam kiya main ko ham na kar paya

mujhe sarab mein manzil dikhai deti thi
so girte paDte bhi raftar kam na kar paya

wo din bhi dekhe hain main ne ki ek luqma-e-tar
dahan tak aaya supurd-e-shikam na kar paya

mujhe ye dukh ki bichhaDne ka waqt tha hi nahin
use malal ki izhaar-e-gham na kar paya

na pas koh-e-nida tha na hath mein banduq
so lauh-e-waqt pe dukhDa raqam na kar paya

kisi ka milna, bichhaDna aur ek do baaten
tamam silsila zeb-e-qalam na kar paya

KHuda ka aks aur us par jamal-e-yar ka aks
faqir mar gaya pani pe dam na kar paya


Source: Book : Dunya Zaad (Pg. 135) Edition : 2012

Leave a comment

+