Subscribe to our newsletter and get our newest updates

Zahida Zaidi

  • Ghazal


taKHil ka dar khole hue sham khaDi hai


taḳh.īl kā dar khole hue shaam khaḌī hai
goyā koī tasvīr ḳhayāloñ meñ jaḌī hai

har manzar-e-idrāk meñ phir jaan paḌī hai
ehsās-e-farāvāñ hai ki sāvan kī jhaḌī hai

hai vasl kā hañgām ki sailāb-e-tajallī
tūfān-e-tarannum hai ki ulfat kī ghaḌī hai

tahzīb-e-alam kahiye ki irfān-e-ġham-e-zāt
kahne ko to do lafz haiñ har baat baḌī hai

saaya ho shajar kā to kahīñ baiTh ke dam leñ
manzil to bahut duur hai aur dhuup kaḌī hai

siine pe mire vaqt kā ye kaun girāñ hai
neze kī anī yā ki kaleje meñ gaḌī hai

vo merī hī gum-gashta haqīqat to nahīñ hai
raste meñ ka.ī roz se shai koī paḌī hai

har lahza pirotī huuñ bikhar jaate haiñ har baar
lamhāt-e-gurezāñ haiñ ki motī kī laḌī hai

ham aur ḳhudā kā bhī ye ehsān uThāte
insān haiñ kuchh aisī hī baat aan paḌī hai

taKHil ka dar khole hue sham khaDi hai
goya koi taswir KHayalon mein jaDi hai

har manzar-e-idrak mein phir jaan paDi hai
ehsas-e-farawan hai ki sawan ki jhaDi hai

hai wasl ka hangam ki sailab-e-tajalli
tufan-e-tarannum hai ki ulfat ki ghaDi hai

tahzib-e-alam kahiye ki irfan-e-gham-e-zat
kahne ko to do lafz hain har baat baDi hai

saya ho shajar ka to kahin baiTh ke dam len
manzil to bahut dur hai aur dhup kaDi hai

sine pe mere waqt ka ye kaun giran hai
neze ki ani ya ki kaleje mein gaDi hai

wo meri hi gum-gashta haqiqat to nahin hai
raste mein kai roz se shai koi paDi hai

har lahza piroti hun bikhar jate hain har bar
lamhat-e-gurezan hain ki moti ki laDi hai

hum aur KHuda ka bhi ye ehsan uThate
insan hain kuchh aisi hi baat aan paDi hai


Leave a comment

+