Subscribe to our newsletter and get our newest updates

Talib Johari

  • Ghazal


jaise hi zina bola tah-KHane ka


jaise hī ziina bolā tah-ḳhāne kā
kunDlī maar ke baiThā saañp ḳhazāne kā

ham bhī zaḳhm-talab the apnī fitrat meñ
vo bhī kuchh sachchā thā apne nishāne kā

rāhib apnī zaat meñ shahr ābād kareñ
dair ke bāhar pahra hai vīrāne kā

baat kahī aur kah kar ḳhud hī kaaT bhī dī
ye bhī ik pairāya thā samjhāne kā

sub.h-savere shabnam chāTne vaale phuul
dekh liyā ḳhamyāza pyaas bujhāne kā

banjar miTTī par bhī baras ai abr-e-karam
ḳhaak kā har zarra maqrūz hai daane kā

'tālib' us ko paanā to dushvār na thā
andesha thā ḳhud apne kho jaane kā

jaise hi zina bola tah-KHane ka
kunDli mar ke baiTha sanp KHazane ka

hum bhi zaKHm-talab the apni fitrat mein
wo bhi kuchh sachcha tha apne nishane ka

rahib apni zat mein shahr aabaad karen
dair ke bahar pahra hai virane ka

baat kahi aur kah kar KHud hi kaT bhi di
ye bhi ek pairaya tha samjhane ka

subh-sawere shabnam chaTne wale phul
dekh liya KHamyaza pyas bujhane ka

banjar miTTi par bhi baras ai abr-e-karam
KHak ka har zarra maqruz hai dane ka

'talib' us ko pana to dushwar na tha
andesha tha KHud apne kho jaane ka


Source: Rooh-e-Ghazal,Pachas Sala Intekhab

Leave a comment

+