Subscribe to our newsletter and get our newest updates

Haidar Qureshi

  • Ghazal


jo bas mein hai wo kar jaana zaruri ho gaya hai


jo bas meñ hai vo kar jaanā zarūrī ho gayā hai
tirī chāhat meñ mar jaanā zarūrī ho gayā hai

hameñ to ab kisī aglī mohabbat ke safar par
nahīñ jaanā thā par jaanā zarūrī ho gayā hai

sitārā jab mirā gardish se bāhar aa rahā hai
to phir dil kā Thahar jaanā zarūrī ho gayā hai

daraḳhtoñ par parinde lauT aanā chāhte haiñ
ḳhizāñ-rut kā guzar jaanā zarūrī ho gayā hai

añdherā is qadar gahrā gayā hai dil ke andar
koī sūraj ubhar jaanā zarūrī ho gayā hai

bahut mushkil huā andar ke rezoñ ko chhupānā
so ab apnā bikhar jaanā zarūrī ho gayā hai

tujhe maiñ apne har dukh se bachānā chāhtā huuñ
tire dil se utar jaanā zarūrī ho gayā hai

na.e zaḳhmoñ kā haq bantā hai ab is dil pe 'haidar'
purāne zaḳhm bhar jaanā zarūrī ho gayā hai

jo bas mein hai wo kar jaana zaruri ho gaya hai
teri chahat mein mar jaana zaruri ho gaya hai

hamein to ab kisi agli mohabbat ke safar par
nahin jaana tha par jaana zaruri ho gaya hai

sitara jab mera gardish se bahar aa raha hai
to phir dil ka Thahar jaana zaruri ho gaya hai

daraKHton par parinde lauT aana chahte hain
KHizan-rut ka guzar jaana zaruri ho gaya hai

andhera is qadar gahra gaya hai dil ke andar
koi suraj ubhar jaana zaruri ho gaya hai

bahut mushkil hua andar ke rezon ko chhupana
so ab apna bikhar jaana zaruri ho gaya hai

tujhe main apne har dukh se bachana chahta hun
tere dil se utar jaana zaruri ho gaya hai

nae zaKHmon ka haq banta hai ab is dil pe 'haidar'
purane zaKHm bhar jaana zaruri ho gaya hai


Leave a comment

+