Subscribe to our newsletter and get our newest updates

Najeeb Ahmad

  • Ghazal

yaqin ne mujhko asir-e-guman na rahne diya


yaqīñ ne mujh ko asīr-e-gumāñ na rahne diyā
ki us ne rabt koī darmiyāñ na rahne diyā

mirī nazar hī samundar kī āḳhirī had thī
mirī thakan ne mujhe par-fishāñ na rahne diyā

kisī ne kashtī utārī to thī samundar meñ
magar havā ne koī bādbāñ na rahne diyā

koī to barf-ba-kaf dasht kī taraf aayā
kisī ne bahr meñ paanī ravāñ na rahne diyā

har ek lafz meñ yuuñ kar diyā lahū shāmil
ki dāstāñ ko faqat dāstāñ na rahne diyā

'najīb' kis tarah jāgeñ ki in añdheroñ ne
sahar kā taarā sar-e-āsmāñ na rahne diyā

yaqin ne mujh ko asir-e-guman na rahne diya
ki us ne rabt koi darmiyan na rahne diya

meri nazar hi samundar ki aaKHiri had thi
meri thakan ne mujhe par-fishan na rahne diya

kisi ne kashti utari to thi samundar mein
magar hawa ne koi baadban na rahne diya

koi to barf-ba-kaf dasht ki taraf aaya
kisi ne bahr mein pani rawan na rahne diya

har ek lafz mein yun kar diya lahu shamil
ki dastan ko faqat dastan na rahne diya

'najib' kis tarah jagen ki in andheron ne
sahar ka tara sar-e-asman na rahne diya


Source: Book : urdu kii chunii hu.ii gazale.n (Pg. 39) Author : devendra issar Publication : sahityaa parkaashak maalbaara delhi (1963) Edition : 1963

Leave a comment

+