rū-ba-rū ġham ke ye taqdīr kahāñ se aa.ī
aur hathelī kī ye tahrīr kahāñ se aa.ī

dil ke goshe meñ jise maiñ ne chhupā rakkhā thā
tere album meñ vo tasvīr kahāñ se aa.ī

dabī ḳhvāhish kā thā iz.hār-e-tamāsha goyā
ḳhvāb thā ḳhvāb ye ta.abīr kahāñ se aa.ī

fan ko maidān khulā chāhiye jiine ke liye
raqs kī raah meñ zanjīr kahāñ se aa.ī

zindagī ke abhī āsār haiñ baaqī varna
daur-e-taḳhrīb meñ ta.amīr kahāñ se aa.ī

DhūñDne nikle the ham maut ke ma.anī lekin
zindagī kī na.ī tafsīr kahāñ se aa.ī

is ko aadam hī kī taqsīr kā samra kahiye
varna jannat kī ye jāgīr kahāñ se aa.ī

vaqt kā sail 'karāmat' tujhe le Duubā thā
yak-ba-yak ye tirī tadbīr kahāñ se aa.ī

ru-ba-ru gham ke ye taqdir kahan se aai
aur hatheli ki ye tahrir kahan se aai

dil ke goshe mein jise main ne chhupa rakkha tha
tere album mein wo taswir kahan se aai

dabi KHwahish ka tha izhaar-e-tamasha goya
KHwab tha KHwab ye tabir kahan se aai

fan ko maidan khula chahiye jine ke liye
raqs ki rah mein zanjir kahan se aai

zindagi ke abhi aasar hain baqi warna
daur-e-taKHrib mein tamir kahan se aai

DhunDne nikle the hum maut ke mani lekin
zindagi ki nai tafsir kahan se aai

is ko aadam hi ki taqsir ka samra kahiye
warna jannat ki ye jagir kahan se aai

waqt ka sail 'karamat' tujhe le Duba tha
yak-ba-yak ye teri tadbir kahan se aai

Source: Deewan-e-Waleeullah Muhib