Subscribe to our newsletter and get our newest updates

Hafeez Jaunpuri

  • Ghazal


chaak-e-daman na raha chaak-e-gareban na raha


chāk-e-dāmāñ na rahā chāk-e-garebāñ na rahā
phir bhī poshīda mirā hāl-e-pareshāñ na rahā

bazm-e-dushman na kabhī darham-o-barham dekhī
kyā tirā daur vo ai gardish-e-daurāñ na rahā

mujh ko afsos ki vo aur adū ke bas meñ
us ko ye ġham ki mirā ab koī pursāñ na rahā

ham ne jo baat kahī thī vahī āḳhir ko huī
tum ne jo raaz chhupāyā thā vo pinhāñ na rahā

munfa.il tark-e-vafā ne mujhe barsoñ rakkhā
chaar din apne kiye par vo pashemāñ na rahā

un kī shoḳhī bhī huī hai mirī vahshat kā javāb
haath Daalā jo garebāñ meñ garebāñ na rahā

ban ga.ī daaġh kaleje kā tamannā-e-visāl
dāġh-e-hasrat ke sivā ab koī armāñ na rahā

ḳhair sab qaul-o-qasam jhuuT sahī ḳhush rahiye
ab mire aap ke vo ahd vo paimāñ na rahā

rokne ko mujhe ġhairat ke sivā is dar par
koī darbāñ na rahā koī nigahbāñ na rahā

miT gayā shaġhl-e-junūñ ab vo kahāñ jāma-darī
zor vahshat kā bhī ab dast-o-garebāñ na rahā

chaar jhiḌkī meñ tire dar se alag ho baiThā
ġhair kuchh roz bhī minnat-kash-e-darbāñ na rahā

vaqt ko haath se kho kar koī duniyā meñ 'hafīz'
umr-bhar merī tarah sar-ba-garebāñ na rahā

chaak-e-daman na raha chaak-e-gareban na raha
phir bhi poshida mera haal-e-pareshan na raha

bazm-e-dushman na kabhi darham-o-barham dekhi
kya tera daur wo ai gardish-e-dauran na raha

mujh ko afsos ki wo aur adu ke bas mein
us ko ye gham ki mera ab koi pursan na raha

hum ne jo baat kahi thi wahi aaKHir ko hui
tum ne jo raaz chhupaya tha wo pinhan na raha

munfail tark-e-wafa ne mujhe barson rakkha
chaar din apne kiye par wo pasheman na raha

un ki shoKHi bhi hui hai meri wahshat ka jawab
hath Dala jo gareban mein gareban na raha

ban gai dagh kaleje ka tamanna-e-visal
dagh-e-hasrat ke siwa ab koi arman na raha

KHair sab qaul-o-qasam jhuT sahi KHush rahiye
ab mere aap ke wo ahd wo paiman na raha

rokne ko mujhe ghairat ke siwa is dar par
koi darban na raha koi nigahban na raha

miT gaya shaghl-e-junun ab wo kahan jama-dari
zor wahshat ka bhi ab dast-o-gareban na raha

chaar jhiDki mein tere dar se alag ho baiTha
ghair kuchh roz bhi minnat-kash-e-darban na raha

waqt ko hath se kho kar koi duniya mein 'hafiz'
umr-bhar meri tarah sar-ba-gareban na raha


Leave a comment

+