mujh ko utaar harf meñ jān-e-ġhazal banā mujhe
merī hī baat mujh se kar merā kahā sunā mujhe

raḳhsh-e-abad-ḳhirām kī thamtī nahīñ haiñ bijliyāñ
sub.h-e-azal-nizhād se karnā hai mashvara mujhe

lauh-e-jahāñ se peshtar likkhā thā kyā nasīb meñ
kaisī thī merī zindagī kuchh to chale pata mujhe

kaise hoñ ḳhvāb aañkh meñ kaisā ḳhayāl dil meñ ho
ḳhud hī har ek baat kā karnā thā faisla mujhe

chhoTe se ik savāl meñ din hī guzar gayā mirā
tū hai ki ab nahīñ hai tū bas ye zarā batā mujhe

kaise guzarnā hai mujhe us pul-sirāt-e-vaqt se
vaise to de ga.e sabhī jaate hue duā mujhe

merā safar mirā hī thā uThte kisī ke kyā qadam
apne liye thā khojnā apnā hī naqsh-e-pā mujhe

lagtā hai chal rahī huuñ maiñ rūh-e-tamām kī taraf
jaisī thī ibtidā mujhe vaisī hai intihā mujhe

mujh ko utar harf mein jaan-e-ghazal bana mujhe
meri hi baat mujh se kar mera kaha suna mujhe

raKHsh-e-abad-KHiram ki thamti nahin hain bijliyan
subh-e-azal-nizhad se karna hai mashwara mujhe

lauh-e-jahan se peshtar likkha tha kya nasib mein
kaisi thi meri zindagi kuchh to chale pata mujhe

kaise hon KHwab aankh mein kaisa KHayal dil mein ho
KHud hi har ek baat ka karna tha faisla mujhe

chhoTe se ek sawal mein din hi guzar gaya mera
tu hai ki ab nahin hai tu bas ye zara bata mujhe

kaise guzarna hai mujhe us pul-siraat-e-waqt se
waise to de gae sabhi jate hue dua mujhe

mera safar mera hi tha uThte kisi ke kya qadam
apne liye tha khojna apna hi naqsh-e-pa mujhe

lagta hai chal rahi hun main ruh-e-tamam ki taraf
jaisi thi ibtida mujhe waisi hai intiha mujhe