Subscribe to our newsletter and get our newest updates

D. Raj Kanwal

  • Ghazal


kisi ne ba-wafa samjha kisi ne bewafa samjha


kisī ne bā-vafā samjhā kisī ne bevafā samjhā
mujhe ġhairoñ ne kyā samjhā mujhe apnoñ ne kyā samjhā

ġham-e-paiham huī sābit jise maiñ ne baqā samjhā
hayāt-e-jāvidāñ niklī jise maiñ ne qazā samjhā

ġhalat samjhā zamāne meñ tujhe dard-āshnā samjhā
mirī nazroñ kā dhokā thā maiñ patthar ko ḳhudā samjhā

vafā kī raah meñ khaa.e haiñ aise bhī kabhī dhoke
vo zālim ibtidā niklī jise maiñ intihā samjhā

use dil kā junūñ kahiye ki merī sādgī kahiye
maiñ har ik rahguzar ko aaj us kā naqsh-e-pā samjhā

bahut mumkin thā maujoñ se mirī kashtī nikal aatī
magar vo rāhzan niklā jise maiñ nāḳhudā samjhā

rah-e-ulfat meñ aise bhī 'kañval' aksar maqām aa.e
jahāñ har dil kī dhaḌkan ko maiñ apnī hī sadā samjhā

kisi ne ba-wafa samjha kisi ne bewafa samjha
mujhe ghairon ne kya samjha mujhe apnon ne kya samjha

gham-e-paiham hui sabit jise main ne baqa samjha
hayat-e-jawidan nikli jise main ne qaza samjha

ghalat samjha zamane mein tujhe dard-ashna samjha
meri nazron ka dhoka tha main patthar ko KHuda samjha

wafa ki rah mein khae hain aise bhi kabhi dhoke
wo zalim ibtida nikli jise main intiha samjha

use dil ka junun kahiye ki meri sadgi kahiye
main har ek rahguzar ko aaj us ka naqsh-e-pa samjha

bahut mumkin tha maujon se meri kashti nikal aati
magar wo rahzan nikla jise main naKHuda samjha

rah-e-ulfat mein aise bhi 'kanwal' aksar maqam aae
jahan har dil ki dhaDkan ko main apni hi sada samjha


Leave a comment

+