aañkh meñ Thahrā huā sapnā bikhar bhī jā.egā
rāt-bhar meñ niiñd kā nashsha utar bhī jā.egā

din kī chamkīlī sadāoñ se gurezāñ rāh-rau
shaam kī sargoshiyāñ sun kar Thahar bhī jā.egā

jism-o-jāñ meñ jaltī-bujhtī larzisheñ rah jā.eñgī
vo mire ehsās ko chhūkar guzar bhī jā.egā

be-ta.alluq sī karegā guftugū mujh se magar
us kā lahja us kī bātoñ se mukar bhī jā.egā

vo bhī hogā āhaToñ kā muntazir merī tarah
aur faqat jhoñkā havā kā us ke ghar bhī jā.egā

aankh mein Thahra hua sapna bikhar bhi jaega
raat-bhar mein nind ka nashsha utar bhi jaega

din ki chamkili sadaon se gurezan rah-rau
sham ki sargoshiyan sun kar Thahar bhi jaega

jism-o-jaan mein jalti-bujhti larzishen rah jaengi
wo mere ehsas ko chhukar guzar bhi jaega

be-talluq si karega guftugu mujh se magar
us ka lahja us ki baaton se mukar bhi jaega

wo bhi hoga aahaTon ka muntazir meri tarah
aur faqat jhonka hawa ka us ke ghar bhi jaega