ruḳh-e-zebā idhar nahīñ kartā
chāhtā hai magar nahīñ kartā

sochtā hai magar samajhtā nahīñ
dekhtā hai nazar nahīñ kartā

band hai us kā dar agar mujh par
kyuuñ mujhe dar-ba-dar nahīñ kartā

harf-e-inkār aur itnā tavīl
baat ko muḳhtasar nahīñ kartā

na kare shahr meñ vo hai to sahī
mehrbānī agar nahīñ kartā

husn us kā usī maqām pe hai
ye musāfir safar nahīñ kartā

jā ke samjhā.eñ kyā use ki 'zafar'
tū bhī to darguzar nahīñ kartā

ruKH-e-zeba idhar nahin karta
chahta hai magar nahin karta

sochta hai magar samajhta nahin
dekhta hai nazar nahin karta

band hai us ka dar agar mujh par
kyun mujhe dar-ba-dar nahin karta

harf-e-inkar aur itna tawil
baat ko muKHtasar nahin karta

na kare shahr mein wo hai to sahi
mehrbani agar nahin karta

husn us ka usi maqam pe hai
ye musafir safar nahin karta

ja ke samjhaen kya use ki 'zafar'
tu bhi to darguzar nahin karta

Source: Raqs-e-lamhaat