pahlū ko tire ishq meñ vīrāñ nahīñ dekhā
is dil ko kabhī ḳhālī-az-armāñ nahīñ dekhā

sūrat ko mirī dekh ke hairat hai tumheñ kyā
tum ne to mirā hāl-e-pareshāñ nahīñ dekhā

muusā hue behosh tajallī-e-laqā se
tālib the magar jalva-e-jānāñ nahīñ dekhā

rote haiñ gunāhoñ pe vahī jin meñ hai īmāñ
kāfir ko kabhī ham ne pashemāñ nahīñ dekhā

dekhā jo mirā dāġh-e-jigar hañs ke vo bole
aisā to charāġh-e-tah-e-dāmāñ nahīñ dekhā

ai dard-e-jigar chain zarā lene de mujh ko
tujh sā bhī koī jaan kā ḳhvāhāñ nahīñ dekhā

sar kaT ke girā shauq se qātil ke qadam par
aisā bhī koī banda-e-ehsāñ nahīñ dekhā

rone pe mirī tum ko tahayyur ye abas hai
kyā tum ne kabhī abr ko giryāñ nahīñ dekhā

dekhī hai bahut aap ne ā.īne kī hairat
āshiq kā magar dīda-e-hairāñ nahīñ dekhā

sar-gashta vo sahrā-e-musībat meñ na hogā
jis ne tirī zulfoñ ko pareshāñ nahīñ dekhā

pūchhā jo 'jamīla' se to vo mujh se ye bole
dil sā to koī dūsrā aivāñ nahīñ dekhā

pahlu ko tere ishq mein viran nahin dekha
is dil ko kabhi KHali-az-arman nahin dekha

surat ko meri dekh ke hairat hai tumhein kya
tum ne to mera haal-e-pareshan nahin dekha

musa hue behosh tajalli-e-laqa se
talib the magar jalwa-e-jaanan nahin dekha

rote hain gunahon pe wahi jin mein hai iman
kafir ko kabhi hum ne pasheman nahin dekha

dekha jo mera dagh-e-jigar hans ke wo bole
aisa to charagh-e-tah-e-daman nahin dekha

ai dard-e-jigar chain zara lene de mujh ko
tujh sa bhi koi jaan ka KHwahan nahin dekha

sar kaT ke gira shauq se qatil ke qadam par
aisa bhi koi banda-e-ehsan nahin dekha

rone pe meri tum ko tahayyur ye abas hai
kya tum ne kabhi abr ko giryan nahin dekha

dekhi hai bahut aap ne aaine ki hairat
aashiq ka magar dida-e-hairan nahin dekha

sar-gashta wo sahra-e-musibat mein na hoga
jis ne teri zulfon ko pareshan nahin dekha

puchha jo 'jamila' se to wo mujh se ye bole
dil sa to koi dusra aiwan nahin dekha

Source: Book : Nuquush Lahore (Pg. 436) Author : Mohd Tufail Publication : Idara Farog-e-urdu, Lahore (Feb.1956) Edition : Feb.1956