dekh dariyā hai kināre ko sambhāl
ye mohabbat ye mohabbat kā zavāl

is zamāne ko taras jā.eñge ham
aah ye tishnagī-e-hijr-o-visāl

mīThī bātoñ se adā jāgtī hai
naram āñkhoñ meñ sañvarte haiñ ḳhayāl

zaḳhm bigḌe to badan kaaT ke pheñk
varna kāñTā bhī mohabbat se nikāl

aap kī yaad bhī aa jaatī hai
itnī mahrūm nahīñ bazm-e-ḳhayāl

ḳhat jo aayā hai unhīñ kā hogā
haañ zarā aaj tabī.at thī bahāl

haa.e phir fasl-e-bahār aa.ī 'ḳhizāñ'
kabhī marnā kabhī jiinā hai muhāl

dekh dariya hai kinare ko sambhaal
ye mohabbat ye mohabbat ka zawal

is zamane ko taras jaenge hum
aah ye tishnagi-e-hijr-o-visal

miThi baaton se ada jagti hai
naram aankhon mein sanwarte hain KHayal

zaKHm bigDe to badan kaT ke phenk
warna kanTa bhi mohabbat se nikal

aap ki yaad bhi aa jati hai
itni mahrum nahin bazm-e-KHayal

KHat jo aaya hai unhin ka hoga
han zara aaj tabiat thi bahaal

hae phir fasl-e-bahaar aai 'KHizan'
kabhi marna kabhi jina hai muhaal