vo jhūTā ishq hai jis meñ fuġhāñ ho
vo kachchī aag hai jis meñ dhuāñ ho

adū tum se tum un se bad-gumāñ ho
tumhāre vo tum un ke pāsbāñ ho

bhalā tum aur mujh par mehrbāñ ho
ināyat ye nasīb-e-dushmanāñ ho

mirā haal aur phir merā bayāñ ho
ajab kyā gar adū bhī ham-zabāñ ho

kaheñ kis se ḳhudī meñ tum kahāñ ho
gila jab ho ki qaabū meñ zabāñ ho

tumhārī be-ruḳhī shikve hamāre
qayāmat tak na puurī dāstāñ ho

zabāñ bahkī huī hairāñ nigāheñ
ḳhayāl-e-dil kahāñ hai tum kahāñ ho

maza jab aa.e un se guftugū kā
payāmī kā dahan merī zabāñ ho

kashīda kyuuñ na ho bāzār-e-yūsuf
ki jab tum sā matā-e-kārvāñ ho

kahūñ kyā rāz-e-dil kyuuñ kar ho bāvar
ki tum sā hī tumhārā rāz-dāñ ho

abhī se kis liye dil chhoḌ baiTheñ
jahāñ tak ho sake āh-o-fuġhāñ ho

wo jhuTa ishq hai jis mein fughan ho
wo kachchi aag hai jis mein dhuan ho

adu tum se tum un se bad-guman ho
tumhaare wo tum un ke pasban ho

bhala tum aur mujh par mehrban ho
inayat ye nasib-e-dushmanan ho

mera haal aur phir mera bayan ho
ajab kya gar adu bhi ham-zaban ho

kahen kis se KHudi mein tum kahan ho
gila jab ho ki qabu mein zaban ho

tumhaari be-ruKHi shikwe hamare
qayamat tak na puri dastan ho

zaban bahki hui hairan nigahen
KHayal-e-dil kahan hai tum kahan ho

maza jab aae un se guftugu ka
payami ka dahan meri zaban ho

kashida kyun na ho bazar-e-yusuf
ki jab tum sa mata-e-karwan ho

kahun kya raaz-e-dil kyun kar ho bawar
ki tum sa hi tumhaara raaz-dan ho

abhi se kis liye dil chhoD baiThen
jahan tak ho sake aah-o-fughan ho

RECITATIONS Fasih Akmal



00:00/00:00 wo jhuTa ishq hai jis mein fughan ho Fasih Akmal