merī ḳhabar na lenā ai yaar hai ta.ajjub
jī se bache jo mujh sā bīmār hai ta.ajjub

vāda-ḳhilāfiyoñ se terī hai dil meñ shub.ha
hove jo hashr meñ bhī dīdār hai ta.ajjub

tum kahte ho ki vo aatā hai paas tere
us yaar se to yaaro bisyār hai ta.ajjub

hastī se ik nafas kā hai fāsla adam tak
tis par bhī hai pahuñchnā dushvār hai ta.ajjub

kaafī na thā tumhāre abrū kā ik ishāra
khīñchī jo āshiqoñ par talvār hai ta.ajjub

sau baar dīn-o-īmāñ gum ho.e to ajab kyā
TuuTe jo ahd-e-ulfat ik yaar hai ta.ajjub

kyūñkar kaTegī yārab auqāt ġham-zadoñ kī
koī nahīñ jahāñ meñ ġham-ḳhvār hai ta.ajjub

nāseh mirā garebāñ siine kā fikr mat kar
sābūt us meñ paanā ik taar hai ta.ajjub

pāmāl dil kiye haiñ aalam ke har qadam meñ
sīkhī ye tum ne kis se raftār hai ta.ajjub

gaalī huī hai ab to takiya-kalām terā
sīdhī zabāñ kasū se guftār hai ta.ajjub

islām meñ ye kaisā inkār kufr se hai
tasbīh meñ piro.e zunnār hai ta.ajjub

dīvāna hai 'muhib' tū terī shikasta-hālī
dekhe jo aañkh uThā kar dildār hai ta.ajjub

har baat meñ jo kahiye majbūr hai qabāhat
insāñ ko gar samjhiye muḳhtār hai ta.ajjub

kuchh gū-magū hai yaaro ye amr bandagī kā
afkār hai achambhā iqrār hai ta.ajjub

meri KHabar na lena ai yar hai tajjub
ji se bache jo mujh sa bimar hai tajjub

wada-KHilafiyon se teri hai dil mein shubha
howe jo hashr mein bhi didar hai tajjub

tum kahte ho ki wo aata hai pas tere
us yar se to yaro bisyar hai tajjub

hasti se ek nafas ka hai fasla adam tak
tis par bhi hai pahunchna dushwar hai tajjub

kafi na tha tumhaare abru ka ek ishaara
khinchi jo aashiqon par talwar hai tajjub

sau bar din-o-iman gum hoe to ajab kya
TuTe jo ahd-e-ulfat ek yar hai tajjub

kyunkar kaTegi yarab auqat gham-zadon ki
koi nahin jahan mein gham-KHwar hai tajjub

naseh mera gareban sine ka fikr mat kar
sabut us mein pana ek tar hai tajjub

pamal dil kiye hain aalam ke har qadam mein
sikhi ye tum ne kis se raftar hai tajjub

gali hui hai ab to takiya-kalam tera
sidhi zaban kasu se guftar hai tajjub

islam mein ye kaisa inkar kufr se hai
tasbih mein piroe zunnar hai tajjub

diwana hai 'muhib' tu teri shikasta-haali
dekhe jo aankh uTha kar dildar hai tajjub

har baat mein jo kahiye majbur hai qabahat
insan ko gar samjhiye muKHtar hai tajjub

kuchh gu-magu hai yaro ye amr bandagi ka
afkar hai achambha iqrar hai tajjub

Source: Rooh-e-Ghazal,Pachas Sala Intekhab