koī nahīñ jo halkā kar de bār-e-safar mujh tanhā kā
dosh pe hai imroz kā bojh aur sar par qarz hai fardā kā

āñdhī aa.e to andesha tūfāñ uTThe to tashvīsh
ek taraf se sahrā kā qurb ek taraf se dariyā kā

kin zaḳhmoñ ke Tāñke TuuTe kin dāġhoñ ke band khule
ḳhuun hai rañgat shām-o-sahar kī aag hai mausam duniyā kā

kūche ke ḳhāmosh gharoñ kī raat se kitnā ġhāfil hai
āḳhir maah ye shor-e-shabāna yārān-e-be-parvā kā

pesh-ravoñ ko is darje par aur bhī kuchh in.aam mile
sañg-e-malāmat kam hī sila hai mere dimāġh-e-saudā kā

ham ko hamārī mahrūmī kī qīmat miltī rahtī hai
dil meñ hamāre baḌh jaatā hai roz ik zaḳhm tamannā kā

koi nahin jo halka kar de bar-e-safar mujh tanha ka
dosh pe hai imroz ka bojh aur sar par qarz hai farda ka

aandhi aae to andesha tufan uTThe to tashwish
ek taraf se sahra ka qurb ek taraf se dariya ka

kin zaKHmon ke Tanke TuTe kin daghon ke band khule
KHun hai rangat sham-o-sahar ki aag hai mausam duniya ka

kuche ke KHamosh gharon ki raat se kitna ghafil hai
aaKHir mah ye shor-e-shabana yaran-e-be-parwa ka

pesh-rawon ko is darje par aur bhi kuchh inam mile
sang-e-malamat kam hi sila hai mere dimagh-e-sauda ka

hum ko hamari mahrumi ki qimat milti rahti hai
dil mein hamare baDh jata hai roz ek zaKHm tamanna ka

Source: Rooh-e-Ghazal,Pachas Sala Intekhab