yuuñ bhī tirā ehsān hai aane ke liye aa
ai dost kisī roz na jaane ke liye aa

har-chand nahīñ shauq ko yārā-e-tamāshā
ḳhud ko na sahī mujh ko dikhāne ke liye aa

ye umr, ye barsāt, ye bhīgī hui rāteñ
in rātoñ ko afsāna banāne ke liye aa

jaise tujhe aate haiñ na aane ke bahāne
aise hī bahāne se na jaane ke liye aa

maanā ki mohabbat kā chhupānā hai mohabbat
chupke se kisī roz jatāne ke liye aa

taqdīr bhī majbūr hai, tadbīr bhī majbūr
is kohna aqīde ko miTāne ke liye aa

aariz pe shafaq, dāman-e-mizhgāñ meñ sitāre
yuuñ ishq kī tauqīr baḌhāne ke liye aa

'tālib' ko ye kyā ilm, karam hai ki sitam hai
jaane ke liye rūTh, manāne ke liye aa

yun bhi tera ehsan hai aane ke liye aa
ai dost kisi roz na jaane ke liye aa

har-chand nahin shauq ko yara-e-tamasha
KHud ko na sahi mujh ko dikhane ke liye aa

ye umr, ye barsat, ye bhigi hui raaten
in raaton ko afsana banane ke liye aa

jaise tujhe aate hain na aane ke bahane
aise hi bahane se na jaane ke liye aa

mana ki mohabbat ka chhupana hai mohabbat
chupke se kisi roz jatane ke liye aa

taqdir bhi majbur hai, tadbir bhi majbur
is kohna aqide ko miTane ke liye aa

aariz pe shafaq, daman-e-mizhgan mein sitare
yun ishq ki tauqir baDhane ke liye aa

'talib' ko ye kya ilm, karam hai ki sitam hai
jaane ke liye ruTh, manane ke liye aa

Source: Funoon(Jadeed Ghazal Number: Volume-002)