nazzāra-e-ruḳh-e-sāqī se mujh ko mastī hai
ye āftāb parastī bhī mai-parastī hai

ḳhudā ko bhuul gayā mahv-e-ḳhud-parastī hai
tū aur kaam meñ hai maut tujh pe hastī hai

na gul haiñ ab na vo saaqī na mai-parastī hai
chaman meñ meñh ke evaz be-kasī barastī hai

ye mulk-e-husn bhī jānāñ ajiib bastī hai
ki dil sī chiiz yahāñ kauḌiyoñ se sastī hai

mah-e-siyām meñ go man.a-e-mai-parastī hai
magar huuñ mast ki har roz fāqa-mastī hai

ye be-sabāt bahār-e-riyāz-e-hastī hai
kalī jo chaTkī to hastī par apnī hañstī hai

bas ek raat kā mehmān charāġh-e-hastī hai
sirhāne ro.egī ab sham.a gor hañstī hai

dilā ye gor-e-ġharībāñ bhī zor bastī hai
bajā.e abr yahāñ be-kasī barastī hai

gayā jo yaañ se tah-e-ḳhāk vo kabhī na phirā
zamīn ke nīche bhī dilchasp koī bastī hai

nahā ke baal nichoḌe to yaar kahne lagā
ghaTā siyāh isī tarah se barastī hai

bas ek haath meñ do TukḌe kar diyā ham ko
hamāre yaar kī ik ye bhī tez-dastī hai

kiyā hai chaak garebān sub.h-e-mahshar tak
ye apne josh-e-junūñ kī darāz-dastī hai

hameñ to qatl kiyā bas isī nazākat ne
ki vo uThātī haiñ teġh aur nahīñ ukastī hai

dikhā ke phuul se chehre ko dil liyā ḳhush ho
jo badle gul ke mile andalīb sastī hai

ab ek tauba pe aatī hai maġhfirat tire haath
ḳharīd kar ki nihāyat ye jins sastī hai

dikhā.e jis ne ye sūrat hameñ dam-e-āḳhir
usī ko dekhne ko ruuh ab tarastī hai

na TuuTī shīsha-e-mai merī sañg-e-marqad se
pas az fanā bhī mujhe pās-e-mai-parastī hai

asiir kar ke hameñ ḳhush na hoiyo sayyād
ki tū bhī yaañ to giraftār-e-dām-e-hastī hai

ajab nahīñ dam-e-īsā se bhī jo gul ho jaate
ki sham-e-sub.h hamārā charāġh-e-hastī hai

vo māñgtā hai mirī jaan rū-numā.ī meñ
yahī jo mol hai to jins-e-husn sastī hai

kiyā hai us ne to yūsuf kā chaak dāman-e-pāk
na pūchho ishq kī jo kuchh darāz-dastī hai

kahūñ maiñ vahī hai saaqī vahī subū vahī jaam
mudām-e-bāda-e-vahdat kī mujh ko mastī hai

alam hai teġh-e-do-dam taire sar jhukā.e huuñ maiñ
tirī galī meñ bhī zālim bulandī pastī hai

jo chāhe rahmat-e-haq ijz kar shi.ār apnā
ravāñ udhar ko hai paanī jidhar ko pastī hai

safed ho ga.ī mū-e-siyāh ġhaflat chhoḌ
huī hai sub.h koī dam charāġh hastī hai

har ik javān kā qad ḳham huā hai piirī se
ma.āl-e-kār bulandī jahāñ meñ pastī hai

vo apnī jumbish-e-abrū dikhā ke kahtā hai
ye vo hai teġh ishāroñ hī se jo kastī hai

che ḳhush bavad ki bar aayed bek karishma do kaar
sanam baġhal meñ hai dil mahv-e-haq-parastī hai

hai ḳhuub pahle se 'goyā' karūñ maiñ tark-e-suḳhan
ki ek dam meñ ye ḳhāmosh sham-e-hastī hai

nazzara-e-ruKH-e-saqi se mujh ko masti hai
ye aaftab parasti bhi mai-parasti hai

KHuda ko bhul gaya mahw-e-KHud-parasti hai
tu aur kaam mein hai maut tujh pe hasti hai

na gul hain ab na wo saqi na mai-parasti hai
chaman mein meinh ke ewaz be-kasi barasti hai

ye mulk-e-husn bhi jaanan ajib basti hai
ki dil si chiz yahan kauDiyon se sasti hai

mah-e-siyam mein go mana-e-mai-parasti hai
magar hun mast ki har roz faqa-masti hai

ye be-sabaat bahaar-e-riyaz-e-hasti hai
kali jo chaTki to hasti par apni hansti hai

bas ek raat ka mehman charagh-e-hasti hai
sirhane roegi ab shama gor hansti hai

dila ye gor-e-ghariban bhi zor basti hai
bajae abr yahan be-kasi barasti hai

gaya jo yan se tah-e-KHak wo kabhi na phira
zamin ke niche bhi dilchasp koi basti hai

naha ke baal nichoDe to yar kahne laga
ghaTa siyah isi tarah se barasti hai

bas ek hath mein do TukDe kar diya hum ko
hamare yar ki ek ye bhi tez-dasti hai

kiya hai chaak gareban subh-e-mahshar tak
ye apne josh-e-junun ki daraaz-dasti hai

hamein to qatl kiya bas isi nazakat ne
ki wo uThati hain tegh aur nahin ukasti hai

dikha ke phul se chehre ko dil liya KHush ho
jo badle gul ke mile andalib sasti hai

ab ek tauba pe aati hai maghfirat tere hath
KHarid kar ki nihayat ye jins sasti hai

dikhae jis ne ye surat hamein dam-e-aKHir
usi ko dekhne ko ruh ab tarasti hai

na TuTi shisha-e-mai meri sang-e-marqad se
pas az fana bhi mujhe pas-e-mai-parasti hai

asir kar ke hamein KHush na hoiyo sayyaad
ki tu bhi yan to giraftar-e-dam-e-hasti hai

ajab nahin dam-e-isa se bhi jo gul ho jate
ki sham-e-subh hamara charagh-e-hasti hai

wo mangta hai meri jaan ru-numai mein
yahi jo mol hai to jins-e-husn sasti hai

kiya hai us ne to yusuf ka chaak daman-e-pak
na puchho ishq ki jo kuchh daraaz-dasti hai

kahun main wahi hai saqi wahi subu wahi jam
mudam-e-baada-e-wahdat ki mujh ko masti hai

alam hai tegh-e-do-dam taire sar jhukae hun main
teri gali mein bhi zalim bulandi pasti hai

jo chahe rahmat-e-haq ijz kar shiar apna
rawan udhar ko hai pani jidhar ko pasti hai

safed ho gai mu-e-siyah ghaflat chhoD
hui hai subh koi dam charagh hasti hai

har ek jawan ka qad KHam hua hai piri se
maal-e-kar bulandi jahan mein pasti hai

wo apni jumbish-e-abru dikha ke kahta hai
ye wo hai tegh ishaaron hi se jo kasti hai

che KHush bawad ki bar aayed bek karishma do kar
sanam baghal mein hai dil mahw-e-haq-parasti hai

hai KHub pahle se 'goya' karun main tark-e-suKHan
ki ek dam mein ye KHamosh sham-e-hasti hai

RECITATIONS Nomaan Shauque



00:00/00:00 nazzara-e-ruKH-e-saqi se mujhko masti hai Nomaan Shauque

Source: