jab bhī nazm-e-mai-kada badlā gayā
ik na ik jām-e-hasīñ toḌā gayā

jab safīna mauj se Takrā gayā
nāḳhudā ko bhī ḳhudā yaad aa gayā

maiñ ne chheḌā qissa-e-jaur-e-falak
jaane kyuuñ un ko pasīna aa gayā

dekh kar un kī jafāoñ kā ḳhulūs
maiñ vafā ke naam par sharmā gayā

aap ab aa.e aañsū poñchhne
jab mire dāman pe dhabba aa gayā

jab bhi nazm-e-mai-kada badla gaya
ek na ek jam-e-hasin toDa gaya

jab safina mauj se Takra gaya
naKHuda ko bhi KHuda yaad aa gaya

main ne chheDa qissa-e-jaur-e-falak
jaane kyun un ko pasina aa gaya

dekh kar un ki jafaon ka KHulus
main wafa ke nam par sharma gaya

aap ab aae aansu ponchhne
jab mere daman pe dhabba aa gaya

Source: Funoon(Jadeed Ghazal Number: Volume-002)