hastī koī aisī bhī hai insāñ ke sivā aur
maz.hab kā ḳhudā aur hai matlab kā ḳhudā aur

phir Thahar gayā qāfila-e-dard sunā hai
shāyad koī raste meñ mirī tarah girā aur

ik jurra-e-āḳhir kī kamī rah ga.ī āḳhir
jitnī vo pilāte ga.e āñkhoñ ne kahā aur

mimbar se bahut fasl hai maidān-e-amal kā
taqrīr ke mard aur haiñ mardān-e-viġhā aur

allāh gila kar ke maiñ pachtāyā huuñ kyā kyā
jab ḳhatm huī baat kahīñ us ne kahā aur

kyā zer-e-lab dost hai iz.hār-e-jasārat
haq ho ki vo nāhaq ho zarā lai to baḌhā aur

daulat kā to pahle hī gunahgār thā mun.im
daulat kī mohabbat ne gunahgār kiyā aur

ye vahm sā hotā hai mujhe dekh ke un ko
sīrat kā ḳhudā aur hai sūrat kā ḳhudā aur

hasti koi aisi bhi hai insan ke siwa aur
mazhab ka KHuda aur hai matlab ka KHuda aur

phir Thahar gaya qafila-e-dard suna hai
shayad koi raste mein meri tarah gira aur

ek jurra-e-aKHir ki kami rah gai aaKHir
jitni wo pilate gae aankhon ne kaha aur

mimbar se bahut fasl hai maidan-e-amal ka
taqrir ke mard aur hain mardan-e-wigha aur

allah gila kar ke main pachtaya hun kya kya
jab KHatm hui baat kahin us ne kaha aur

kya zer-e-lab dost hai izhaar-e-jasarat
haq ho ki wo nahaq ho zara lai to baDha aur

daulat ka to pahle hi gunahgar tha munim
daulat ki mohabbat ne gunahgar kiya aur

ye wahm sa hota hai mujhe dekh ke un ko
sirat ka KHuda aur hai surat ka KHuda aur

Source: Book : Nuquush Lahore (Pg. 470) Author : Mohd Tufail Publication : Idara Farog-e-urdu, Lahore (Feb.1956 ) Edition : Feb.1956