sar-barahna bharī barsāt meñ ghar se nikle
ham bhī kis gardish-e-hālāt meñ ghar se nikle

din meñ kis kis ko batā.eñge masāfat kā sabab
bas yahī soch ke ham raat meñ ghar se nikle

sar pe ḳhud apnī salīboñ ko uThā.e ham log
ruuh kā bojh liye zaat meñ ghar se nikle

kab baras jaa.eñ in āñkhoñ kā bharosa hī nahīñ
kaun be-vaqt kī barsāt meñ ghar se nikle

Dar gayā dekh ke maiñ shahr-e-muhazzab kā chalan
kitne aaseb fasādāt meñ ghar se nikle

ain mumkin hai kī vo din meñ numāyāñ hī na ho
us sitāre se kaho raat meñ ghar se nikle

un kī fitrat meñ taġhāful bhī murkkab thā 'nafas'
ham hī nādāñ the jo jazbāt meñ ghar se nikle

sar-barahna bhari barsat mein ghar se nikle
hum bhi kis gardish-e-haalat mein ghar se nikle

din mein kis kis ko bataenge masafat ka sabab
bas yahi soch ke hum raat mein ghar se nikle

sar pe KHud apni salibon ko uThae hum log
ruh ka bojh liye zat mein ghar se nikle

kab baras jaen in aankhon ka bharosa hi nahin
kaun be-waqt ki barsat mein ghar se nikle

Dar gaya dekh ke main shahr-e-muhazzab ka chalan
kitne aaseb fasadat mein ghar se nikle

ain mumkin hai ki wo din mein numayan hi na ho
us sitare se kaho raat mein ghar se nikle

un ki fitrat mein taghaful bhi murkkab tha 'nafas'
hum hi nadan the jo jazbaat mein ghar se nikle

Source: Sang-e-meel