ghaTtī baḌhtī raushniyoñ ne mujhe samjhā nahīñ
maiñ kisī patthar kisī dīvār kā saayā nahīñ

jaane kin rishtoñ ne mujh ko bāñdh rakkhā hai ki maiñ
muddatoñ se āñdhiyoñ kī zad meñ huuñ bikhrā nahīñ

zindagī biphre hue dariyā kī koī mauj hai
ik daf.a dekhā jo manzar phir kabhī dekhā nahīñ

har taraf bikhrī huī haiñ ā.īne kī kirchiyāñ
reza reza aks haiñ sālim koī chehrā nahīñ

kahte kahte kuchh badal detā hai kyuuñ bātoñ kā ruḳh
kyuuñ ḳhud apne-āp ke bhī saath vo sachchā nahīñ

ghaTti baDhti raushniyon ne mujhe samjha nahin
main kisi patthar kisi diwar ka saya nahin

jaane kin rishton ne mujh ko bandh rakkha hai ki main
muddaton se aandhiyon ki zad mein hun bikhra nahin

zindagi biphre hue dariya ki koi mauj hai
ek dafa dekha jo manzar phir kabhi dekha nahin

har taraf bikhri hui hain aaine ki kirchiyan
reza reza aks hain salim koi chehra nahin

kahte kahte kuchh badal deta hai kyun baaton ka ruKH
kyun KHud apne-ap ke bhi sath wo sachcha nahin

Source: Book : Saweera (magazine-56 (Pg. 161) Author : Salahuddin Mahmood Publication : Saweera art Press, Pakistan (1979) Edition : 1979