Subscribe to our newsletter and get our newest updates

Najeeba Arif

  • Ghazal


nigah-o-ruKH par hai likhi jati jo baat lab par ruki hui hai


nigāh-o-ruḳh par hai likhī jaatī jo baat lab par rukī huī hai
mahak chhupe bhī to kaise dil meñ kalī jo ġham kī khilī huī hai

jo dil se lipTā hai saañp ban kar Darā rahā hai bachā rahā hai
ye saarī raunaq us ik tasavvur ke dam se hī to lagī huī hai

ḳhayāl apnā kamāl apnā uruuj apnā zavāl apnā
ye kin bhulayyoñ meñ Daal rakhā hai kaisī liilā rachī huī hai

ham apnī kashtī sarāb-gāhoñ meñ Daal kar muntazir khaḌe haiñ
na paar lagte na Dūbte haiñ har ik ravānī thamī huī hai

azal abad to faqat havāle haiñ vaqt kī be-maqām gardish
ḳhabar nahīñ hai thame kahāñ par kahāñ se jaane chalī huī hai

bhaḌak ke jalnā nahīñ gavārā to mere parvardigār maulā
na aisī ātish nafas meñ bharte ki jis se jaañ par banī huī hai


Source: Book : Pakistani Adab (Pg. 706) Author : Dr. Rashid Amjad Publication : Pakistan Academy of Letters, Islambad, Pakistan(2009) Edition : 2009

Leave a comment

+