Subscribe to our newsletter and get our newest updates

Hafeez Jalandhari

  • Ghazal


miTne wali hasraten ijad kar leta hun main


miTne vaalī hasrateñ ījād kar letā huuñ maiñ
jab bhī chāhūñ ik jahāñ ābād kar letā huuñ maiñ

mujh ko in majbūriyoñ par bhī hai itnā iḳhtiyār
aah bhar letā huuñ maiñ fariyād kar letā huuñ maiñ

husn be-chāra to ho jaatā hai akasr mehrbāñ
phir use āmāda-e-be-dād kar letā huuñ maiñ

tū nahīñ kahtā magar dekh o vafā-nā-āshnā
apnī hastī kis qadar barbād kar letā huuñ maiñ

haañ ye vīrāna ye dil ye ārzūoñ kā mazār
tum kaho to phir ise ābād kar letā huuñ maiñ

jab koī taaza musībat TūTtī hai ai 'hafīz'
ek aadat hai ḳhudā ko yaad kar letā huuñ maiñ

miTne wali hasraten ijad kar leta hun main
jab bhi chahun ek jahan aabaad kar leta hun main

mujh ko in majburiyon par bhi hai itna iKHtiyar
aah bhar leta hun main fariyaad kar leta hun main

husn be-chaara to ho jata hai akasr mehrban
phir use aamada-e-be-dad kar leta hun main

tu nahin kahta magar dekh o wafa-na-ashna
apni hasti kis qadar barbaad kar leta hun main

han ye virana ye dil ye aarzuon ka mazar
tum kaho to phir ise aabaad kar leta hun main

jab koi taza musibat TuTti hai ai 'hafiz'
ek aadat hai KHuda ko yaad kar leta hun main


Pachas Sala Intekhab"

Leave a comment

+