Subscribe to our newsletter and get our newest updates

Bakul Dev

  • Ghazal


samaat ke liye ek imtihan hai


samā.at ke liye ik imtihāñ hai
ḳhamoshī in dinoñ misl-e-bayāñ hai

safar apne hī bhītar kar rahā huuñ
mirā Thahrāv muddat se ravāñ hai

havas shāmil hai thoḌī sī duā meñ
abhī is lau meñ halkā sā dhuāñ hai

nayā ik ḳhvāb dekheñ aur ro.eñ
ab itnī taab āñkhoñ meñ kahāñ hai

uḌā detī hai apnī ḳhaak jab tab
zamīñ kī justujū bhī āsmāñ hai

tabhī aahoñ ke sur uThte haiñ is se
hamārā soz-e-jāñ hī sāz-e-jāñ hai

hamesha duur se dekhā kiyā huuñ
jahāñ mujh ko javāhir kī dukāñ hai

mirā kirdār is meñ ho gayā gum
tumhārī yaad bhī ik dāstāñ hai

mohabbat ek kashtī muḳhtasar sī
tamannāoñ kā dariyā be-karāñ hai

maiñ saare fāsle tai kar chukā huuñ
ḳhudī jo darmiyāñ thī darmiyāñ hai

'bakul' ḳhvāboñ ke panchhī aa base haiñ
hamārā āshiyāñ ab āshiyāñ hai

samaat ke liye ek imtihan hai
KHamoshi in dinon misl-e-bayan hai

safar apne hi bhitar kar raha hun
mera Thahraw muddat se rawan hai

hawas shamil hai thoDi si dua mein
abhi is lau mein halka sa dhuan hai

naya ek KHwab dekhen aur roen
ab itni tab aankhon mein kahan hai

uDa deti hai apni KHak jab tab
zamin ki justuju bhi aasman hai

tabhi aahon ke sur uThte hain is se
hamara soz-e-jaan hi saz-e-jaan hai

hamesha dur se dekha kiya hun
jahan mujh ko jawahir ki dukan hai

mera kirdar is mein ho gaya gum
tumhaari yaad bhi ek dastan hai

mohabbat ek kashti muKHtasar si
tamannaon ka dariya be-karan hai

main sare fasle tai kar chuka hun
KHudi jo darmiyan thi darmiyan hai

'bakul' KHwabon ke panchhi aa base hain
hamara aashiyan ab aashiyan hai


Leave a comment

+