kabhī pairoñ se āñkhoñ tak chubhan mahsūs hotī hai
kabhī ye zindagī mujh ko chaman mahsūs hotī hai

masāfat ne musāfir se kahā tū thak rahā hai kyuuñ
thakan mahsūs karne se thakan mahsūs hotī hai

to phir maiñ sochtā huuñ ruuh kī pākīzgī kyā hai
mohabbat jab mujhe apnā badan mahsūs hotī hai

buland-o-bālā lagtī hai kabhī ye āsmāñ jitnī
kabhī ye chhat mujhe apnā kafan mahsūs hotī hai

vahāñ miTTī-tale maiñ haa.e kaise saañs khīñchūñgā
mujhe taaza havā meñ bhī ghuTan mahsūs hotī hai

na āñkhoñ meñ vo pahle sā koī favvāra uThtā hai
na siine meñ vo pahlī sī jalan mahsūs hotī hai

ye duniyā pahle bhī ḳhud meñ magan mahsūs hotī thī
ye duniyā aaj bhī ḳhud meñ magan mahsūs hotī hai

kabhi pairon se aankhon tak chubhan mahsus hoti hai
kabhi ye zindagi mujh ko chaman mahsus hoti hai

masafat ne musafir se kaha tu thak raha hai kyun
thakan mahsus karne se thakan mahsus hoti hai

to phir main sochta hun ruh ki pakizgi kya hai
mohabbat jab mujhe apna badan mahsus hoti hai

buland-o-baala lagti hai kabhi ye aasman jitni
kabhi ye chhat mujhe apna kafan mahsus hoti hai

wahan miTTi-tale main hae kaise sans khinchunga
mujhe taza hawa mein bhi ghuTan mahsus hoti hai

na aankhon mein wo pahle sa koi fawwara uThta hai
na sine mein wo pahli si jalan mahsus hoti hai

ye duniya pahle bhi KHud mein magan mahsus hoti thi
ye duniya aaj bhi KHud mein magan mahsus hoti hai

Source: Book : Ghazaliyat-e-ahsaan Danish (Pg. 176) Author : Shabnam Parveen Publication : Asghar Publishers (2006) Edition : 2006