dhaḌkan dhaḌkan yādoñ kī bārāt akelā kamra
maiñ aur mere zaḳhmī ehsāsāt akelā kamra

ga.e dinoñ kī tasvīroñ ke bujhte hue nuqūsh
taaza tark-e-ta.alluq ke sadmāt akelā kamra

dosh-e-havā par uḌne vaale ḳhizāñ ke āḳhirī patte
apnī akelī jaan ġham-e-hālāt akelā kamra

āḳhirī shab ke chāñd se karnā bālkanī meñ bāteñ
us ke shahr meñ hotel kī ye raat akelā kamra

merī sisaktī āvāzoñ se gūñjtī haiñ dīvāreñ
suntā hai din raat mare naġhmāt akelā kamra

sab sāmān baham haiñ 'sājid' likhne likhāne ke
ḳhūn-e-jigar aur aañsū dil kī davāt akelā kamra

dhaDkan dhaDkan yaadon ki baraat akela kamra
main aur mere zaKHmi ehsasat akela kamra

gae dinon ki taswiron ke bujhte hue nuqush
taza tark-e-talluq ke sadmat akela kamra

dosh-e-hawa par uDne wale KHizan ke aaKHiri patte
apni akeli jaan gham-e-haalat akela kamra

aaKHiri shab ke chand se karna baalkani mein baaten
us ke shahr mein hotel ki ye raat akela kamra

meri sisakti aawazon se gunjti hain diwaren
sunta hai din raat mare naghmat akela kamra

sab saman baham hain 'sajid' likhne likhane ke
KHun-e-jigar aur aansu dil ki dawat akela kamra

Source: Book : Be-nishaan (Pg. 206) Author : wali aalam Shahiin Publication : Dabistan-e-jadeed (1984) Edition : 1984