butoñ se bach ke chalne par bhī aafat aa hī jaatī hai
ye kāfir vo qayāmat haiñ tabī.at aa hī jaatī hai

ye sab kahne kī bāteñ haiñ ham un ko chhoḌ baiTheñ haiñ
jab āñkheñ chaar hotī haiñ muravvat aa hī jaatī hai

vo apnī shoḳhiyoñ se koī ab tak ba.az aate haiñ
hamesha kuchh na kuchh dil meñ sharārat aa hī jaatī hai

hamesha ahd hote haiñ nahīñ milne ke ab un se
vo jab aa kar lipaTte haiñ mohabbat aa hī jaatī hai

kahīñ ārām se do din falak rahne nahīñ detā
hamesha ik na ik sar par musībat aa hī jaatī hai

mohabbat dil meñ dushman kī bhī apnā rañg laatī hai
vo kitne be-muravvat hoñ muravvat aa hī jaatī hai

'zahīr'-e-ḳhasta-jāñ shab so rahā kuchh khā ke sunte haiñ
ta.ajjub kyā hai insāñ ko hamiyyat aa hī jaatī hai

buton se bach ke chalne par bhi aafat aa hi jati hai
ye kafir wo qayamat hain tabiat aa hi jati hai

ye sab kahne ki baaten hain hum un ko chhoD baiThen hain
jab aankhen chaar hoti hain murawwat aa hi jati hai

wo apni shoKHiyon se koi ab tak baz aate hain
hamesha kuchh na kuchh dil mein shararat aa hi jati hai

hamesha ahd hote hain nahin milne ke ab un se
wo jab aa kar lipaTte hain mohabbat aa hi jati hai

kahin aaram se do din falak rahne nahin deta
hamesha ek na ek sar par musibat aa hi jati hai

mohabbat dil mein dushman ki bhi apna rang lati hai
wo kitne be-murawwat hon murawwat aa hi jati hai

'zahir'-e-KHasta-jaan shab so raha kuchh kha ke sunte hain
tajjub kya hai insan ko hamiyyat aa hi jati hai