Subscribe to our newsletter and get our newest updates

Obaidullah Siddiqui

  • Ghazal


pahle chingari se ek shola banata hai mujhe


pahle chiñgārī se ik shola banātā hai mujhe
phir vahī tez havāoñ se Darātā hai mujhe

bain karte hue is raat ke sannāTe meñ
dasht se ghar kī taraf kaun bulātā hai mujhe

gard hote hue chehre se milāne ke liye
ā.ina-ḳhāne meñ koī liye jāatā hai mujhe

shaam hotī hai to merā hī fasāna aksar
vo jo TuuTā huā taarā hai sunātā hai mujhe

reg-e-sahrā se ta.alluq ko baḌhā detā hai
ḳhvāb meñ jab bhī vo dariyā nazar aatā hai mujhe

pahle chingari se ek shola banata hai mujhe
phir wahi tez hawaon se Daraata hai mujhe

bain karte hue is raat ke sannaTe mein
dasht se ghar ki taraf kaun bulata hai mujhe

gard hote hue chehre se milane ke liye
aaina-KHane mein koi liye jaata hai mujhe

sham hoti hai to mera hi fasana aksar
wo jo TuTa hua tara hai sunata hai mujhe

reg-e-sahra se talluq ko baDha deta hai
KHwab mein jab bhi wo dariya nazar aata hai mujhe


Leave a comment

+