Subscribe to our newsletter and get our newest updates

Hafeez Merathi

  • Ghazal


bazm-e-takallufat sajaane mein rah gaya


bazm-e-takallufāt sajāne meñ rah gayā
maiñ zindagī ke naaz uThāne meñ rah gayā

tāsīr ke liye jahāñ tahrīf kī ga.ī
ik jhol bas vahīñ pe fasāne meñ rah gayā

sab mujh pe mohr-e-jurm lagāte chale ga.e
maiñ sab ko apne zaḳhm dikhāne meñ rah gayā

ḳhud hādsa bhī maut pe us kī thā dam-ba-ḳhud
vo dūsroñ kī jaan bachāne meñ rah gayā

ab ahl-e-kārvāñ pe lagātā hai tohmateñ
vo ham-safar jo hiile bahāne meñ rah gayā

maidān-e-kār-zār meñ aa.e vo qaum kyā
jis kā javān ā.īna-ḳhāne meñ rah gayā

vo vaqt kā jahāz thā kartā lihāz kyā
maiñ dostoñ se haath milāne meñ rah gayā

suntā nahīñ hai muft jahāñ baat bhī koī
maiñ ḳhālī haath aise zamāne meñ rah gayā

bāzār-e-zindagī se qazā le ga.ī mujhe
ye daur mere daam lagāne meñ rah gayā

ye bhī hai ek kār-e-numāyāñ 'hafīz' kā
kyā sāda-lauh kaise zamāne meñ rah gayā

bazm-e-takallufat sajaane mein rah gaya
main zindagi ke naz uThane mein rah gaya

tasir ke liye jahan tahrif ki gai
ek jhol bas wahin pe fasane mein rah gaya

sab mujh pe mohr-e-jurm lagate chale gae
main sab ko apne zaKHm dikhane mein rah gaya

KHud hadsa bhi maut pe us ki tha dam-ba-KHud
wo dusron ki jaan bachane mein rah gaya

ab ahl-e-karwan pe lagata hai tohmaten
wo ham-safar jo hile bahane mein rah gaya

maidan-e-kar-zar mein aae wo qaum kya
jis ka jawan aaina-KHane mein rah gaya

wo waqt ka jahaz tha karta lihaz kya
main doston se hath milane mein rah gaya

sunta nahin hai muft jahan baat bhi koi
main KHali hath aise zamane mein rah gaya

bazar-e-zindagi se qaza le gai mujhe
ye daur mere dam lagane mein rah gaya

ye bhi hai ek kar-e-numayan 'hafiz' ka
kya sada-lauh kaise zamane mein rah gaya


Source: Book : Shabkhoon (Urdu Monthly) (Pg. 914) Author : Shamsur Rahman Faruqi Publication : Shabkhoon Po. Box No.13, 313 rani Mandi Allahabad (June December 2005áIssue No. 293 To 299âPart II) Edition : June December 2005áIssue No. 293 To 299âPart II

Leave a comment

+