ḳhvāboñ se yuuñ to roz bahalte rahe haiñ ham
kitnī haqīqatoñ ko badalte rahe haiñ ham

apne ġhubār meñ bhī hai vo zauq-e-sar-kashī
pāmāl hauke arsh pe chalte rahe haiñ ham

sau sau tarah se tujh ko sañvārā hai husn-e-dost
sau sau tarah se rañg badalte rahe haiñ ham

har dasht-o-dar meñ phuul khilāne ke vāste
akasr to nok-e-ḳhār pe chalte rahe haiñ ham

ā.īn-e-pāsdārī-e-sahrā na chhuT sakā
vaz-e-junūñ agarche badalte rahe haiñ ham

saaqī na multafit ho to piinā harām hai
pyāse bhī mai-kade se nikalte rahe haiñ ham

koī ḳhalīl jis ko na gulzār kar sakā
tere liye is aag pe chalte rahe haiñ ham

kyā jaane kab vo sub.h-e-bahārāñ ho jalva-gar
daur-e-ḳhizāñ meñ jis se bahalte rahe haiñ ham

pursān-e-hāl kab huī vo chashm-e-be-niyāz
jab bhī gire haiñ ḳhud hī sambhalte rahe haiñ ham

sāhil kī ishratoñ ko ḳhabar bhī na ho sakī
tūfān ban ke laakh machalte rahe haiñ ham

taḳh.īl-e-lāla-kār ye kahtī hai ai 'surūr'
koī zamīñ ho phūlte-phalte rahe haiñ ham

KHwabon se yun to roz bahalte rahe hain hum
kitni haqiqaton ko badalte rahe hain hum

apne ghubar mein bhi hai wo zauq-e-sar-kashi
pamal hauke arsh pe chalte rahe hain hum

sau sau tarah se tujh ko sanwara hai husn-e-dost
sau sau tarah se rang badalte rahe hain hum

har dasht-o-dar mein phul khilane ke waste
akasr to nok-e-KHar pe chalte rahe hain hum

aain-e-pasdari-e-sahra na chhuT saka
waz-e-junun agarche badalte rahe hain hum

saqi na multafit ho to pina haram hai
pyase bhi mai-kade se nikalte rahe hain hum

koi KHalil jis ko na gulzar kar saka
tere liye is aag pe chalte rahe hain hum

kya jaane kab wo subh-e-bahaaran ho jalwa-gar
daur-e-KHizan mein jis se bahalte rahe hain hum

pursan-e-haal kab hui wo chashm-e-be-niyaz
jab bhi gire hain KHud hi sambhalte rahe hain hum

sahil ki ishraton ko KHabar bhi na ho saki
tufan ban ke lakh machalte rahe hain hum

taKHil-e-lala-kar ye kahti hai ai 'surur'
koi zamin ho phulte-phalte rahe hain hum

Source: Seep Samundar Moti