gum-shuda tanhā.iyoñ kī rāz-dāñ achchhī to ho
maiñ yahāñ achchhā nahīñ huuñ tum vahāñ achchhī to ho

vaqt-e-ruḳhsat bhīge bhīge in darīchoñ kī qasam
nūr-paikar chāñd-sūrat gulistāñ achchhī to ho

thartharāte kāñpte hoñToñ ko aayā kuchh sukūñ
ai zabāñ rakhte hue bhī be-zabāñ achchhī to ho

dhuup ne jab aarzū ke jism ko nahlā diyā
ban ga.ī thiiñ tum vafā kā sā.ebāñ achchhī to ho

raat bhar chille vazīfe vo tahajjud aur fajr
mil gayā ab to sila ai merī maañ achchhī to ho

is zamāne meñ jab apnoñ kā bharosa ho fareb
sochtī rahtī ho maiñ jā.ūñ kahāñ achchhī to ho

jhilmilāte haiñ sitāre raat ko palkoñ pe jab
chāñd se suntī ho merī dāstāñ achchhī to ho

vo tumhārī ik sahelī ban ga.ī thī jo dulhan
us se ḳhat likh kar kabhī pūchhā nihāñ achchhī to ho

jab kahīñ jaao to likh denā mujhe apnā pata
pūchhne varna maiñ jā.ūñgā kahāñ achchhī to ho

tum sadā achchhī raho 'āzar' kī hai bas ye duā
fāsle sadiyoñ ke haiñ ab darmiyāñ achchhī to ho

gum-shuda tanhaiyon ki raaz-dan achchhi to ho
main yahan achchha nahin hun tum wahan achchhi to ho

waqt-e-ruKHsat bhige bhige in darichon ki qasam
nur-paikar chand-surat gulistan achchhi to ho

thartharaate kanpte honTon ko aaya kuchh sukun
ai zaban rakhte hue bhi be-zaban achchhi to ho

dhup ne jab aarzu ke jism ko nahla diya
ban gai thin tum wafa ka saeban achchhi to ho

raat bhar chille wazife wo tahajjud aur fajr
mil gaya ab to sila ai meri man achchhi to ho

is zamane mein jab apnon ka bharosa ho fareb
sochti rahti ho main jaun kahan achchhi to ho

jhilmilate hain sitare raat ko palkon pe jab
chand se sunti ho meri dastan achchhi to ho

wo tumhaari ek saheli ban gai thi jo dulhan
us se KHat likh kar kabhi puchha nihan achchhi to ho

jab kahin jao to likh dena mujhe apna pata
puchhne warna main jaunga kahan achchhi to ho

tum sada achchhi raho 'azar' ki hai bas ye dua
fasle sadiyon ke hain ab darmiyan achchhi to ho