Subscribe to our newsletter and get our newest updates

Ehsan Danish

  • Ghazal


ishq ki duniya mein ek hangama barpa kar diya


ishq kī duniyā meñ ik hañgāma barpā kar diyā
ai ḳhayāl-e-dost ye kyā ho gayā kyā kar diyā

zarre zarre ne mirā afsāna sun kar daad dī
maiñ ne vahshat meñ jahāñ ko terā shaidā kar diyā

tuur par rāh-e-vafā meñ bo diye kāñTe kalīm
ishq kī vus.at ko masdūd-e-taqāzā kar diyā

bistar-e-mashriq se sūraj ne uThāyā apnā sar
kis ne ye mahfil meñ zikr-e-husn-e-yaktā kar diyā

chashm-e-nargis jā-e-shabnam ḳhuun ro.egī nadīm
maiñ ne jis din gulsitāñ kā raaz ifshā kar diyā

qais ye merāj-e-ulfat hai ki ejāz-e-junūñ
najd ke har zarre ko tasvīr-e-lailā kar diyā

mudda.ā-e-dil kahūñ 'ehsān' kis ummīd par
vo jo chāheñge kareñge aur jo chāhā kar diyā

ishq ki duniya mein ek hangama barpa kar diya
ai KHayal-e-dost ye kya ho gaya kya kar diya

zarre zarre ne mera afsana sun kar dad di
main ne wahshat mein jahan ko tera shaida kar diya

tur par rah-e-wafa mein bo diye kanTe kalim
ishq ki wusat ko masdud-e-taqaza kar diya

bistar-e-mashriq se suraj ne uThaya apna sar
kis ne ye mahfil mein zikr-e-husn-e-yakta kar diya

chashm-e-nargis ja-e-shabnam KHun roegi nadim
main ne jis din gulsitan ka raaz ifsha kar diya

qais ye meraj-e-ulfat hai ki ejaz-e-junun
najd ke har zarre ko taswir-e-laila kar diya

muddaa-e-dil kahun 'ehsan' kis ummid par
wo jo chahenge karenge aur jo chaha kar diya


Leave a comment

+