maiñ ne jab jab bhī tirā naam likhā kāġhaz par
yuuñ lagā jaise koī phuul khilā kāġhaz par

ek muddat se mulāqāt ko bechain hai dil
bhej de likh ke mujhe apnā patā kāġhaz par

ḳhat tirā jab bhī koī maiñ ne purānā kholā
to ubhar aayā hasīñ naqsh tirā kāġhaz par

likhne baiThā huuñ tire naam koī ḳhat jab bhī
aañkh se ashk girā sabt huā kāġhaz par

chāra-gar aa ki sivā dard-e-jigar hotā hai
bhej de likh ke mujhe varna davā kāġhaz par

tujh ko iz.hār-e-mohabbat kī qasam itnā batā
bevafā kyuuñ kiyā iz.hār-e-vafā kāġhaz par

kyā hai taqdīr meñ allāh ḳhabar rakhtā hai
kaun paḌhtā hai muqaddar kā likhā kāġhaz par

dād-o-tahsīn kī kānoñ meñ sadā.eñ gaūñjīñ
jab bhī 'gauhar' ne koī sher kahā kāġhaz par

main ne jab jab bhi tera nam likha kaghaz par
yun laga jaise koi phul khila kaghaz par

ek muddat se mulaqat ko bechain hai dil
bhej de likh ke mujhe apna pata kaghaz par

KHat tera jab bhi koi main ne purana khola
to ubhar aaya hasin naqsh tera kaghaz par

likhne baiTha hun tere nam koi KHat jab bhi
aankh se ashk gira sabt hua kaghaz par

chaara-gar aa ki siwa dard-e-jigar hota hai
bhej de likh ke mujhe warna dawa kaghaz par

tujh ko izhaar-e-mohabbat ki qasam itna bata
bewafa kyun kiya izhaar-e-wafa kaghaz par

kya hai taqdir mein allah KHabar rakhta hai
kaun paDhta hai muqaddar ka likha kaghaz par

dad-o-tahsin ki kanon mein sadaen gaunjin
jab bhi 'gauhar' ne koi sher kaha kaghaz par